ერთიანი ნეიტრალური საქართველოს წევრმა, ვატო შაქარიშვილმა სამთავრობო ტელეკომპანია "იმედის" ეთერში განაცხადა, რომ ერთიანი ნეიტრალური საქართველო საქართველოს ხედავს, როგორც ნეიტრალურ სახელმწიფოს. მისივე თქმით, ჰქონდათ იდეა, რომ "ნეიტრალიტეტთან დაკავშირებით კითხვა დასმულიყო ქართული საზოგადოების მიმართ — პლებისციტის, ან რეფერენდუმის სახით".

"ძალიან ნათლად იკვეთება ახალი მსოფლიო წესრიგის კონტურები, რომელიც იქნება მრავალპოლუსიანი და ამ ვითარებაში ერთიანი ნეიტრალური საქართველო ჩვენს ქვეყანას ხედავს როგორც ნეიტრალურ სახელმწიფოს. მიგვაჩნია, რომ სწორედ ეს არის ის ერთადერთი მყარი გარანტი იმისა, რომ ჩვენს ქვეყანაში გრძელვადიანად მოვახერხოთ მშვიდობის, სტაბილურობის და ეკონომიკური წინსვლის უზრუნველყოფა.

სამწუხაროდ ხელისუფლება ევრო-ამერიკულ ილუზიაშია კვლავ, აგრძელებს რა რიტორიკას ევროკავშირში გაწევრიანებაზე, გამოხატავს რა იმედს აშშ-ის ახალ ადმინისტრაციასთან ურთიერთობის გადატვირთვასთან დაკავშირებით მაშინ, როდესაც საკმარისზე მეტი დრო გავიდა რომ გამოჩენილიყო, რომ ტრამპის ბაქიბუქის უკან რეალურად არ დგას ბრძოლა "დიფ სთეითთან", არამედ, უფრო მეტიც — პრეზიდენტი ტრამპი დღემდე ასრულებს ამ ოლიგარქიული ოჯახების და მათი ინსტრუმენტის — "დიფ სთეითის" დავალებებს“

… ოკუპირებული ტერიტორიების პირობებში უნდა იყოს მკაფიო განაცხადი, რომ საქართველო არ აპირებს დიდ სახელმწიფოთა შორის დაპირისპირებაში პოლიგონად გადაიქცეს ისევე, როგორც ეს მოხდა უკრაინის შემთხვევაში. გვქონდა იდეა, რომ ნეიტრალიტეტთან დაკავშირებით კითხვა პირდაპირ დაისვას ქართული საზოგადოების მიმართ — პლებისციტის, ან რეფერენდუმის სახით. გარდა ამისა, კვლევებსაც ვატარებთ. ეს იდეა გაიზომება არჩევნებში, სადაც ჩვენც მივიღებთ მონაწილეობას", — თქვა ვატო შაქარიშვილმა.

შეგახსენებთ, რომ მოძრაობამ "ერთიანი ნეიტრალური საქართველო" გუშინ გაავრცელა ინფორმაცია იმის შესახებ, რომ პოლიტიკური პარტიის დაფუძნება გადაწყვიტეს. მათივე თქმით, უახლოეს პერიოდში ჩატარდება პარტიის დამფუძნებელი ყრილობა და დაიწყებენ მზადებას საპარლამენტო არჩევნებისათვის.