"როგორ უნდა აკადრო შენს მოქალაქეს, შენს ისტორიას და შენს წარსულს, რომ ცალ ფეხზე დადგე იმიტომ, რომ სადღაც, რომელიღაც გაერთიანებაში გინდა მოხვედრა?!", — ასე უპასუხა ოცნების დანიშნულმა პრეზიდენტმა, მიხეილ ყაველაშვილმა, გამჭვირვალობისა და FARA-ს კანონთან დაკავშირებით ჟურნალისტის კითხვას აჭარის ტელევიზიის ეთერში.

მისი თქმით, მიღებული კანონის მიზანი უცხოეთიდან დაფინანსებული ორგანიზაციების გამჭვირვალობის უზრუნველყოფა იყო და კეთილსინდისიერად მომუშავე ორგანიზაციას დასამალი არაფერი აქვს.

"ჩვენ ვიცოდით ამ კანონს რატომ ვიღებდით, ჩვენ გამჭვირვალობა გვინდოდა. დემოკრატიულ სახელმწიფოში, სადაც დაცულია სუბორდინაცია, არჩევნებით არჩეული ხელისუფლება უნდა იყოს ყველაზე ლეგიტიმური. რაღაც წარმონაქმნია არასამთავრობო ორგანიზაცია, სამოქალაქო საზოგადოება, რომელიც ცდილობდა, რომ ყველაფერ ამაზე მაღლა დამდგარიყო. თან არანაირი ლეგიტიმაცია არ აქვს ჩვენი მოქალაქისგან. გარედან დაფინანსებული ორგანიზაცია ცდილობდა, რომ ხელისუფალს და პარლამენტს შორის მდგარიყო, მის გარეშე არც ერთი საკითხი, არც ერთი კანონი არ უნდა მიღებულიყო. ", — განაცხადა მიხეილ ყაველაშვილმა.

მისი თქმით, ქვეყანას გარედან დაფინანსებული ორგანიზაციების გამჭვირვალობა სჭირდება.

"რა თქმა უნდა, კანონმა იმუშავა. ჩემს სამშობლოს, ჩემს ქვეყანას, ჩემს სახელმწიფოს სჭირდება გამჭვირვალობა, მით უმეტეს გარედან დაფინანსებული ორგანიზაციების, რას აკეთებენ და როგორ მოქმედებენ. ეს ძალიან მარტივი გასაგები უნდა იყოს ყველა მოქალაქისთვის", — განაცხადა ყაველაშვილმა.