ისრაელის ძალებმა კვლავ შეუტიეს სამიზნეებს ღაზაში მას შემდეგ, რაც სამხრეთ ღაზას სექტორში ისრაელის თავდაცვის ძალების ჯარისკაცებს ცეცხლი გაუხსნეს.

ისრაელის თავდაცვის ძალებმა (IDF) ღაზას სექტორში საჰაერო დარტყმები განახორციელეს ისლამისტური დაჯგუფება "ჰამასის" მებრძოლების პოზიციებზე, რომლებიც გერმანიამ, ევროკავშირმა და შეერთებულმა შტატებმა ტერორისტულ დაჯგუფებად გამოაცხადეს. ამის შესახებ ისრაელის პრემიერმინისტრის, ბენიამინ ნეთანიაჰუს ოფისმა სამშაბათს, 28 ოქტომბერს განაცხადა.

"უსაფრთხოების კონსულტაციების შემდეგ, პრემიერმინისტრმა ნეთანიაჰუმ სამხედროებს უბრძანა დაუყოვნებლივ დაეწყოთ მასშტაბური საჰაერო დარტყმები ღაზას სექტორზე", — ნათქვამია განცხადებაში.

მედიასაშუალებების ცნობით, ისრაელის საჰაერო დარტყმები სამხრეთ ღაზას სექტორში განხორციელდა. "ჰამასის" მიერ კონტროლირებადმა ადგილობრივმა ჯანდაცვის სამინისტრომ ცხრა დაღუპულის შესახებ განაცხადა. გაურკვეველია, ისინი მშვიდობიანი მოქალაქეები იყვნენ თუ მებრძოლები.

ადრე ისრაელის თავდაცვის მინისტრმა, ისრაელ კაცმა, ჰამასის მებრძოლები ღაზას სექტორში ისრაელის თავდაცვის ძალების ჯარისკაცებზე თავდასხმასა და ცეცხლის შეწყვეტის დარღვევაში დაადანაშაულა. მინისტრმა არ დააკონკრეტა, სად მოხდა თავდასხმა. მედიის ცნობით, ეს მოხდა ეგვიპტის საზღვარზე, ქალაქ რაფასთან ახლოს.

28 ოქტომბერს, აშშ-ის ვიცეპრეზიდენტმა ჯ.დ. ვენსმა ღაზას სექტორში ახალი დარტყმების შესახებ რეპორტიორის კითხვას უპასუხა და თქვა:

"ცეცხლის შეწყვეტის შეთანხმება ძალაში რჩება, მაგრამ ეს არ ნიშნავს, რომ არ იქნება მცირე სროლები".

ვენსმა დაადასტურა, რომ ისრაელის თავდაცვის ძალების ჯარისკაცებს ჰამასის მებრძოლებმა ან "ღაზას სექტორიდან ვინმემ“ ესროლეს. "ჩვენ ველით, რომ ისრაელი ამაზე რეაგირებას მოახდენს. მაგრამ მე ვფიქრობ, რომ პრეზიდენტის მიერ მიღწეული მშვიდობა დიდხანს გაგრძელდება", — თქვა აშშ-ის ვიცეპრეზიდენტმა.