თბილისის მერობის დამოუკიდებელი კანდიდატი, ალეკო ელისაშვილი წინასაარჩევნო დებატებთან დაკავშირებით ტელევიზიებს მიმართავს, რომ ნუ დაუჯერებენ ქართული ოცნების შეთავაზებას და თავიანთი სარედაქციო პოლიტიკის შესაბამისად დაგეგმონ გადაცემა. თუმცა აღნიშნავს, რომ ის საერთო დებატებშიც მიიღებს მონაწილეობას:

"მსურს მივმართო ტელევიზიებს, რომ ჩვენ ჩრდილოეთ კორეაში არ ვცხოვრობთ და ქართული ოცნების შტაბისა და პარტიული დირექტივებით ნუ გადაწყვეტთ როგორი ფორმატით უნდა იყოს დებატები. მოდით თქვენი დახმარებით, მოქალაქეებს ვაჩვენოთ ვის როგორი ურბანული ხედვა აქვს და ვინ როგორ აპირებს ამ პრობლემების გადაჭრას".

ელისაშვილის ამბობს, რომ კახა კალაძე მის შემოთავაზებას გაურბის და კიდევ ერთხელ მიმართავს, რომ მზად არის ნებისმიერი არხის მიერ გადაწყვეტილ ფორმატში, პირისპირ დაჯდეს დებატებში მასთან ერთად:

"კახი კალაძე და ქართული ოცნება გაურბიან ჩემს შეთავაზებას. ახლა, ცდილობენ როგორღაც ეს გაქცევა გააპრავონ. მედიას თავს ახვევენ გაურკვეველ ფორმატს, აბსოლიტურ აჯაფსანდალს და არა დებატებს, რომ ყველა ერთად შეგროვდეს, ჟურნალისტიან, კანდიდატიან მხარდამჭერიანა".

დღეს, კახა კალაძის შტაბის ხელმძღვანელმა არჩილ თალაკვაძემ განაცხადა, რომ თბილისის მერობის კანდიდატი კახა კალაძე მზადაა, საერთო დებატში მიიღოს მონაწილეობა, რომელიც ყველასთვის თანაბარ პირობებს უზრუნველყოფს.