ჰელენ მირენი 80 წლის ასაკშიც აქტიურად აგრძელებს საქმიანობას და შეჩერებას არ აპირებს. ლეგენდარულმა ინგლისელმა მსახიობმა სულ ახლახან ითამაშა ნეტფლიქსის დეტექტიურ ფილმში ხუთშაბათის მკვლელობის კლუბი. იგი ასევე მონაწილეობს Paramount+-ის ახალ სერიალში MobLand. ბოლოდროინდელ პროექტებთან ერთად, უახლეს ინტერვიუში მირენმა არაერთ სხვა თემაზეც ილაპარაკა, მათ შორის, ასაკის მატებაზე და იმ შიშის აბსურდულობაზე, რომელიც ზოგიერთისთვის თან ახლავს ხანში შესვლას.

"აი, დარდი! მე ხომ ცოცხალი ვარ, შემიძლია ვიმუშაო, ჭიქა ღვინო დავლიო, მაკიაჟი ვატარო, მუსიკას მოვუსმინო, ლამაზი დაისი ვიხილო, თეატრში ან კინოში წავიდე, ნეტფლიქსს ჩავუჯდე და, უბრალოდ, ვიცხოვრო. ეს შესანიშნავია", — აცხადებს მსახიობი და ამატებს, რომ თავისი ასაკის ყველა მხარე მოსწონს.

თუმცა, მირენის თქმით, ასაკის მატებას არცთუ სასიამოვნო რაღაცები შეიძლება მოჰყვეს, მაგალითად, თმის მოცულობის დაკარგვა. მსახიობი "დაკარგულად" თვლის კოვიდპანდემიის ორ წელსაც — ეს კი განსაკუთრებით გულდასაწყვეტია, როცა იცი, რომ ბევრი წელი აღარ დაგრჩაო.

თუმცა, მსახიობი მაინც სკეპტიკურადაა განწყობილი ადამიანების ხანგრძლივად ცხოვრებით შეპყრობის მიმართ. მისი თქმით, ეს ბუნების წინააღმდეგ წასვლაა.

"დიდი ხანია, იმ ასაკს გადავცდი, სადამდეც ალბათ ასიოდე წლის წინ ვიცხოვრებდი", — ამბობს მირენი, — "თუმცა, მაინც მგონია, რომ ცხოვრების გასახანგრძლივებელი რაღაცების მოგონება ოცნება, ფანტაზიაა. რადგან თუკი, მაგალითად, 150 წლამდე ცხოვრება უნდათ, 150 წლის ასაკს კი არ ნატრობენ, არამედ უნდათ, მაგ ასაკში 30 წლისას ჰგავდნენ. სამყარო და ბუნება კი ასე არაა მოწყობილი".

ამის მიუხედავად, მსახიობი ყველას ურჩევს, ფიზიკური აქტივობით დაკავდნენ. რამდენიმე თვის წინ, მირენმა თქვა, რომ ვარჯიშის დაწყება გვიანი არაა არც 50 ან 60 წლის ასაკს გადაცილებულებისთვის.

"აუცილებელი არაა, სავარჯიშო დარბაზში იაროთ, პატარა ცვლილებებით დაიწყეთ, მაგალითად, ფეხით სეირნობით ან იოგათი".

ახალ ინტერვიუში კი მსახიობი იმასაც აღნიშნავს, რომ არანაირი "სილამაზის რუტინა" არ გააჩნია — უბრალოდ, მოწევისგან იკავებს თავს. სამაგიეროდ, არ ერიდება მზეს: ამბობს, რომ მზის აბაზანების მიღება უყვარს, მაგრამ, ცხადია, მზისგან დამცავი საშუალებით.

მირენს ასევე ჰკითხეს, რას ურჩევდა მათ, ვისაც ასაკის მატების და ამის კვალის სახეზე დამჩნევის ეშინია.

"ეს მაინც მოხდება", — აღნიშნავს იგი, — "როგორც უნდა გეშინოდეთ, ეს არაფერს შეცვლის, მაინც მოხდება, ასე რომ, ისღა დაგრჩენიათ, ამასთან ერთად ცხოვრება ისწავლოთ; ცხოვრების გზაზე დგომა ისწავლოთ. დედაჩემი სულ მეუბნებოდა ხოლმე, დაბერების ნუ შეგეშინდებაო. როცა 16 წლის ხარ, 30 წელი ასაკოვანად გეჩვენება და მას უფრთხი, მაგრამ როცა ოცდაათის ხდები, აღმოჩნდება, რომ თურმე შესანიშნავი ყოფილაო. 30-დან 40-მდე საუკეთესო პერიოდია და ამ დროს სულაც არ გინდა, ისევ თექვსმეტის იყო. 30 წლის ასაკი შესანიშნავია, ისევე, როგორც 40, 50, 60 და ასე შემდეგ. ცხადია, უარყოფითი მხარეებიც არსებობს, მაგრამ [ასაკის მატებას] კიდევ უფრო შესანიშნავი მხარეები აქვს და ამას თავადვე დაინახავ".

როცა სიტყვა თექვსმეტი წლის ასაკზე ჩამოვარდა, მირენმა ასევე თქვა, რომ "ერთი სული აქვს", ნახოს, როგორ შეცვლის მსოფლიოს ახალგაზრდობა.

"ამ ასაკში ცა ქუდად არ მიგაჩნია და დედამიწა — ქალამნად, მაგრამ სწორედ მათ უნდა მიხედონ დედამიწას, მათ უნდა გადაიბარონ მართვის სადავეები", — ამატებს იგი, — "ახლა მათი ჯერია. ჩემი დრო წავიდა, ასეა ყველაფერი მოწყობილი".