ოცნების პრემიერმა, ირაკლი კობახიძემ "პირველი არხის" ეთერში განაცხადა, რომ პარტიების ჩამონათვალი, რომელთა აკრძალვაც საკონსტიტუციო სასამართლოს ძალით სურთ, მცირე პარტიების ჩათვლით, შეიძლება ათამდე იყოს.

ასაკრძალი პარტიების სიის შედგენის პრინციპი, მისი თქმით, ასეთია: პირველი — "პარტია შედგება იმ ადამიანებისგან, რომლებიც წარმოადგენდნენ სისხლიან რეჟიმს. აქ იგულისხმება ნაცმოძრაობა, ახალი და რამდენიმე მცირე პარტია". მეორე კრიტერიუმია — "ვინც ამ სისხლიან პარტიასთან ერთად ჩართული იყო სახელმწიფოს წინააღმდეგ საბოტაჟში".

"ზუსტი სია გახდება ცნობილი რამდენიმე დღეში, როდესაც სარჩელი შევა ოფიციალურად საკონსტიტუციო სასამართლოში. გეტყვით რა არის პრინციპი: პირველი, როცა პარტია შედგება იმ ადამიანებისგან, რომლებიც წარმოადგენდნენ სისხლიან რეჟიმს. რა თქმა უნდა, მათ შეეხებათ სარჩელი.

მარტივად, ვინ იყვნენ ხელისუფლების წარმომადგენლები, რომლებიც არიან დღეს კონკრეტული პარტიების ხელმძღვანელები — ეს არის ნაცმოძრაობა, ეს არის ახალი და რამდენიმე მცირე პარტია. მეორე კრიტერიუმი არის რა — "ვინც ამ სისხლიან პარტიასთან ერთად ჩართული იყო სახელმწიფოს წინააღმდეგ საბოტაჟში წლების მანძილზე, რა თქმა უნდა, მათაც შეეხებათ სარჩელი. შეიძლება იყოს ათამდე პარტია, ვნახოთ... მცირე პარტიების ჩათვლით", — თქვა კობახიძემ.

რაც შეეხება ლელოს და გახარიას, ირაკლი კობახიძე მიიჩნევს, რომ ისინიც, "კოლექტიური ნაცმოძრაობის" დღის წესრიგის განუყოფელი ნაწილს წარმოადგენენ.

"რაც შეეხება ლელოს და გახარიას, თუ რატომ მიგვაჩნია, რომ ისინი არიან "კოლექტიური ნაცმოძრაობის" დღის წესრიგის განუყოფელი ნაწილი - ავიღოთ 2020-2021 წლები და 2024 წელი, ორი ძირითადი საპარლამენტო არჩევნები და 2021 წლის არჩევნები, რომელიც უთანაბრდებოდა თავისი დატვირთვით საპარლამენტო არჩევნებს. ყველა ამ შემთხვევაში, ამ პოლიტიკურმა ძალებმა, ზუსტად იგივე დღის წესრიგი აირჩიეს, რაც აირჩია “ნაცმოძრაობამ” და მისმა მეორე დანაყოფმა. ზუსტად იგივე — საბოტაჟი საკუთარი ქვეყნის წინააღმდეგ. ასევე, კანდიდატის სტატუსთან დაკავშირებით ისინი ბოლომდე იყვნენ ჩართულები საბოტაჟში. ეს იყო მათი საერთო დღის წესრიგი, რომლითაც მოქმედებდნენ ეს პოლიტიკური ძალები, მათ შორის, საბოტაჟთან დაკავშირებით, რომელიც არის ჩვენი სარჩელის ერთ-ერთი მთავარი საყრდენი, ამაზეა აგებული ჩვენი პრეტენზია კონკრეტული პარტიების არაკონსტიტუციურობასთან დაკავშირებით. 4 ოქტომბრის გეგმას ერთადერთი გახარია გაემიჯნა, ლელო - არა. ლელომ თქვა, რომ 20:00-საათამდე მიდიოდნენ არჩევნებზე და 20:00 საათის შემდეგ უერთდებოდნენ დამხობის აქციას. ბოლოს ისინიც გაემიჯნნენ, მას შემდეგ, რაც ჩავარდა მათი გეგმა, ისევე როგორც გაემიჯნნენ სოფო ჯაფარიძე და სალომე ზურაბიშვილი. ერთადერთი - გახარიას პარტია იყო, რომელიც გაემიჯნა, მაგრამ ის მთელი ამ წლების განმავლობაში არ გაემიჯნა გამუდმებულ საბოტაჟს ჩვენი ქვეყნისა და სახელმწიფო ინსტიტუტების წინააღმდეგ. მეტიც, გახარიას პარტიას ჰქონდა შექმნილი კოალიცია ნაცმოძრაობასთან 4 წლის განმავლობაში, რამდენიმე მუნიციპალიტეტში. მათ დღის წესრიგს მიჰყვებოდნენ. როცა ქმნი კოალიციას თავისი არსით არაკონსტიტუციურ პარტიასთან, ეს უტყუარად ნიშნავს შენს არაკონსტიტუციურობასაც. აქედან გამომდინარე, მე ვფიქრობ, ყველაფერი ცხადია, თუმცა ჩვენ უნდა დაველოდოთ საკონსტიტუციო სასამართლოს გადაწყვეტილებას", — განაცხადა კობახიძემ.