"ყველას აქვს რაღაც პროფესია და დამნაშავეებსაც აქვთ თავისი პროფესია, ქურდსაც, ყაჩაღსაც და ხელისუფლების დამამხობელსაც", — ამის შესახებ ოცნების პარლამენტის თავმჯდომარემ, შალვა პაპუაშვილმა 4 ოქტომბრის აქციის საქმეზე დაკავებულ გიორგი ჩახუნაშვილთან დაკავშირებით განაცხადა. მისი თქმით, "პროფესიული დისკრიმინაცია ვერ მოხდება და იმის გარჩევა, რომ უმუშევარი დავიჭიროთ და არა უმუშევარი არ დავიჭიროთ".

"სახელმწიფო გადატრიალება, ჩავარდა ხელისუფლების დამხობა. რა თქმა უნდა, პასუხისმგებლობა მოჰყვება ამას. ის, ვინც ბედავს და იჩენს სითამამეს, მათ შორის, კონკრეტულად ეს ადამიანი, რომელიც პრეზიდენტის რეზიდენციის ეზოში შეიჭრა და სხვებსაც მიუთითებდა, რომ შესულიყვნენ. თუკი ეყო ამ ადამიანს იმის სითამამე, რომ დაერღვია კანონი და შესულიყო პრეზიდენტის რეზიდენციის ტერიტორიაზე, მაშინ უნდა ეყოს იმის სითამამე, რომ მიიღოს ამაზე პასუხისმგებლობა. ასე არ არის, ცხოვრება არ არის თვითმომსახურების მაღაზია, სადაც რასაც გინდა აიღებ და რასაც გინდა არ აიღებ. როდესაც, მით უმეტეს, როდესაც ადამიანებს ცხოვრებისეული გამოცილება აქვთ. როდესაც მიდიხარ რაღაც ნაბიჯზე და ის სითამამეც უნდა გქონდეს, რომ მიღო პასუხისმგებლობა.

ყველას აქვს რაღაც პროფესია და დამნაშავეებსაც აქვთ თავისი პროფესია, ქურდსაც, ყაჩაღსაც და ხელისუფლების დამამხობელსაც. პროფესიული დისკრიმინაცია ვერ მოხდება და იმის გარჩევა, რომ უმუშევარი დავიჭიროთ და არა უმუშევარი არ დავიჭიროთ. ნუ ახლა ეს რა მორალია, საერთოდ გაუგებარია. მარტივი საკითხი — არის ცხადი, რომ იგეგმებოდა ხელისუფლების დამხობა.ა რის ცხადი, რომ იყო მოწოდება ხელისუფლებისკენ. არის ცხადი, რომ დაიწყო აღსრულება ამ მოწოდებისა. ჩვენ პირდაპირ ეთერში ვხედავდით ადამიანებს, რომლებიც შეიჭრნენ პრეზიდენტის რეზიდენციაში", — განაცხადა შალვა პაპუაშვილმა.

შეგახსენებთ, რომ 9 ოქტომბერს, 4 ოქტომბრის აქციის საქმეზე 71 წლის პედიატრი, აკადემიკოსი გიორგი ჩახუნაშვილი საკუთარი საცხოვრებელი სახლიდან აიყვანეს.

"მთელი ჩემი ცხოვრებაა ვემსახურები საქართველოს. 350 ათასზე მეტი ბავშვი მყავს უფასოდ გასინჯული. [ბრალს] არ ვეთანხმები. [პოლიციას] მივყვები. არაფერი გულდასაწყვეტი არ არის. სამშობლო მიყვარდა, დღესაც მიყვარს და ხვალაც მეყვარება. აქცია იყო მშვიდობიანი, არავის არაფრის გადატრიალება და გადმოტრიალება არ უნდოდა. ამას არ ვეთანხმები

...საქართველო აუცილებლად იქნება ევროატლანტიკური დიდი ოჯახის წევრი... კომუნისტური წყობის დროსაც ვიცავდი საქართველოს, გავიარე დიდი გზა, დღესაც შემიძლია, გავიარო დიდი გზა... არაფერი დათრგუნული არ ვარ. სამშობლოსთვის ვიბრძოდი, დღესაც ვიბრძოლებ. ჰა, რამდენსაც მომისჯიან, 80 წლის გამოვალ?! გამოვალ", — ამბობს დაკავებამდე გადაღებულ ვიდეოში 71 წლის ექიმი, გიორგი ჩახუნაშვილი პოლიციელებთან საუბრისას.