საპატრიარქოს საზოგადოებასთან ურთიერთობის სამსახურის ხელმძღვანელი, ანდრია ჯაღმაიძე სოციალურ ქსელში განცხადებას ავრცელებს და აღნიშნავს, რომ არქიმანდრიტი დოროთე ყურაშვილი არ გამოხატავს ქართული ეკლესიის პოზიციას და საკუთარი შეხედულებების მიხედვით მოქმედებს. მისივე თქმით, საპატრიარქოს 4 ოქტომბრის ოფიციალური განცხადების შინაარსთან არქიმანდრიტი დოროთე ყურაშვილის ქმედება წინააღმდეგობაში მოდის.

"ხშირად ისმის შეკითხვა:

— არქიმანდრიტი დოროთე ყურაშვილი, საპროტესტო მოძრაობაში ჩართვით, გამოხატავს თუ არა ქართული ეკლესიის პოზიციას?

პასუხია:

— არა, არქიმანდრიტი დოროთე ყურაშვილი მოქმედებს საკუთარი შეხედულების მიხედვით და არა პატრიარქის კურთხევით.

4 ოქტომბრის საპატრიარქოს განცხადებაში, მისი ოფიციალური პოზიციაა ასახული, არქიმანდრიტი დოროთეს ქმედება კი მის შინაარსთან მოდის წინააღმდეგობაში.

საქართველოს საპატრიარქოს განცხადება

▪️ არჩევნებს, საერთოდ ყველგან და საქართველოშიც, დაძაბული ფონი ახლავს. სამწუხაროდ, ჩვენთან მუდმივად არის მცდელობა იმისაც, რომ ამ დაძაბულობაში სასულიერო პირებიც ჩართონ, რაც არასწორია.

▪️ საქართველოს მართლმადიდებელი ეკლესია, როგორც ერის გამაერთიანებელი ძალა, არ შეიძლება პოლიტიკურ მხარედ წარმოჩინდეს; როგორც არაერთხელ გვითქვამს, ეკლესია ყოველთვის იყო და იქნება მშვიდობისა და ქრისტიანული ღირებულებების მხარდამჭერი და ემიჯნება რადიკალურ მოწოდებებსა და ისეთ ქმედებებს, რამაც შეიძლება დაპირისპირებას შეუწყოს ხელი.

▪️ არჩევნები იმიტომ ტარდება, რომ ხალხმა თავისი ნება ამ საშუალებით გამოხატოს.

▪️ ღმერთმა მშვიდობით აკურთხოს სრულიად საქართველო.

04.10.2025", — წერია საპატრიარქოს საზოგადოებასთან ურთიერთობის სამსახურის ხელმძღვანელის განცხადებაში.

ცნობისთვის, არქიმანდრიტი დოროთე ყურაშვილი 4 ოქტომბრის აქციაზე იმყოფებოდა და სიტყვითაც გამოვიდა.

"დღეს ჩვენ დამოუკიდებლობა კი გვაქვს შენარჩუნებული ფორმალურად, მაგრამ ჩვენ უკვე დამოუკიდებლად არ ვართ იმიტომ, რომ დამოუკიდებელი ადამიანები არ გვმართავენ, არ მართავენ საქართველოს. ამიტომ საქართველო ეკუთვნის ხალხს. კონსტიტუციაში გვიწერია, რომ ძალაუფლების წყარო არის ხალხი და ყველა სამართალდამცველი ვალდებულია, ძალაუფლების წყაროს დაემორჩილოს და არ დაუპირისპირდეს, არამედ მათი ნება შეასრულოს და არა ერთი ადამიანის. ამიტომ, ყველას მოვუწოდებ, რომ არ გადადგან ხალხის საწინააღმდეგო ნაბიჯი ისე, როგორც ეს გაუკეთებიათ. გუშინდელი სისხლი, რომელიც ახალგაზრდობას ადინეს იყოს ბოლო საქართველოში. მე მჯერა თქვენი, მე მჯერა გამარჯვების და ჩვენ უკვე გამარჯვებულები ვართ, რადგან ნათელ მხარეზე ვდგავართ. გაუმარჯოს თავისუფალ საქართველოს", — განაცხადა არქიმანდრიტმა დოროთე ყურაშვილმა 4 ოქტომბრის აქციაზე.