ინციდენტების პრევენციისა და რეაგირების მექანიზმის (IPRM) ფარგლებში გამართული შეხვედრის შემდეგ, ოკუპირებული სამხრეთ ოსეთი სოფელ წნელისთან განლაგებული ქართული ბლოგპოსტის გაუქმებას ელის. ამის შესახებ ოკუპირებული სამხრეთ ოსეთის დელეგაციის ხელმძღვანელმა, იგორ კოჩიევმა განაცხადა.

"არსებობს სერიოზული იმედები, რომ ეს ქართული ბლოგპოსტი სამხრეთ ოსეთის ტერიტორიიდან მოიხსნება და გაუქმდება", — განაცხადა კოჩიევმა.

როგორც სააგენტო "რესი" წერს, მას ეს იმედები საქართველოს ხელმძღვანელობის განცხადებებს უკავშირდება იმასთან დაკავშირებით, რომ პოსტის განლაგება "სერიოზული შეცდომა" იყო.

"ეს შეიძლება იყოს შიდა პოლიტიკური ბრძოლა საქართველოში, მაგრამ ის ფაქტი, რომ საქართველოს ხელმძღვანელობამ ეს საკითხი წამოჭრა და აღიარებს, რომ მისი ჩადგმა შეცდომა იყო, გარკვეულ იმედს უტოვებს", — დასძინა კოჩიევმა.

საერთო ჯამში, ოკუპირებული სამხრეთ ოსეთის დელეგაციის ხელმძღვანელმა აღნიშნა, რომ საზღვარზე სიტუაცია მშვიდი და პროგნოზირებადი რჩება.

ოკუპირებული სამხრეთ ოსეთის დელეგაციის ხელმძღვანელის განცხადებებს გამოეხმაურა პარტია გახარია საქართველოსთვის ერთ-ერთი ლიდერი ბერდია სიჭინავა. მისი თქმით, ამ განცხადებებით "კიდევ ერთხელ დადასტურდა მარტივი ჭეშმარიტება, რომ ჩორჩანაში გიორგი გახარია იცავდა ქართულ მიწას".

"კიდევ ერთხელ დადასტურდა მარტივი ჭეშმარიტება, რომ ჩორჩანაში გიორგი გახარია იცავდა ქართულ მიწას, მის წინააღმდეგ შეთითხნილი 20-წლიანი საქმით კი „ოცნება“ გამოუსწორებელ ზიანს აყენებს ჩვენი ქვეყნის ტერიტორიულ მთლიანობას და ცხინვალის საოკუპაციო რეჟიმის ინტერესებში მოქმედებს.

მოვითხოვთ, კონკრეტულ განმარტებებს, რომ ქართული საზოგადოება დეტალურად იყოს ინფორმირებული ჩორჩანას საგუშაგოს საკითხზე გამართული შეხვედრის შესახებ, ცხინვალის საოკუპაციო მარიონეტული რეჟიმის მიერ გამოხატულ პრეტენზიებსა და ჩვენი მხარის მიერ დაფიქსირებულ პოზიციებთან დაკავშირებით",— განაცხადა ბერდია სიჭინავამ.

ცნობისათვის, სწორედ სოფელ წნელისის მოსაზღვრე სოფელია ჩორჩანა, სადაც საგუშაგოს ჩადგმასთან დაკავშირებით ჰქონდათ კითხვები ოცნების პარლამენტის საგამოძიებო კომისიაზე ყოფილი პრემიერმინისტრის, გიორგი გახარიას მიმართ.

ჩორჩანა

ჩორჩანა

მიმდინარე წლის 14 ივნისს კი ცნობილი გახდა, რომ პროკურატურამ დაიწყო გამოძიება "2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შინაგან საქმეთა ყოფილი მინისტრის, გიორგი გახარიას მიერ განხორციელებული ქმედებას ეხება".

უწყების ინფორმაციით, გამოძიება სისხლის სამართლის კოდექსით, "საბოტაჟის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე" მიმდინარეობს.