ერგნეთში ინციდენტების პრევენციისა და მასზე რეაგირების მექანიზმის ფარგლებში მორიგი შეხვედრა იმართება.

შეხვედრაზე მთავარი განსახილველი საკითხი საოკუპაციო ხაზთან მომხდარი ინციდენტი იქნება. საუბარია ორი დღის წინ რუსი სამხედროების მიერ ოთხი არასრულწლოვანის დაკავებაზე.

"შეხვედრაზე მთავარი საკითხი იქნება უკანონო პატიმრობაში მყოფი საქართველოს მოქალაქეების გათავისუფლება. ამ დროისთვის უკანონო პატიმრობაში იმყოფება საქართველოს 11 მოქალაქე. იანვრიდან დღემდე საანგარიშო პერიოდში 23 დაკავების შემთხვევა დაფიქსირდა. წინა შეხვედრიდან დღემდე კი უკანონო დაკავების შვიდ ფაქტს ჰქონდა ადგილი. დღევანდელ შეხვედრაზე ვისაუბრებთ უკანონო ბორდერიზაციის ფაქტებზე. რვა შემთხვევა ქარელის, გორისა და კასპის მუნიციპალიტეტებში მოხდა. დღევანდელ შეხვედრაზე, ბუნებრივია, საუბარი შეეხება ორი დღის წინ მომხდარ ინციდენტს. მთავარია, რომ შემჭიდროებულ ვადებში დაბრუნდნენ არასრულწლოვნები ოჯახებში. დანარჩენ დეტალებს შეხვედრის დასრულების შემდეგ ვისაუბრებთ", – განაცხადა სუს-ის ანალიტიკური დეპარტამენტის დირექტორის მოადგილემ, ირაკლი ანთაძემ (კომენტარს "პირველი არხი" ავრცელებს).