"თალიბანის" ადმინისტრაციამ ავღანეთის ჩრდილოეთ პროვინციებში ინტერნეტი აკრძალა. ამის შესახებ ინფორმაციას CNN ავრცელებს. მათი თქმით, ეს "ამორალური ქმედებების აღსაკვეთად," გადადგმული ნაბიჯია.

მკაცრი ისლამისტური მოძრაობა მანამდეც გამოხატავდა შეშფოთებას პორნოგრაფიისა და "ონლაინ ფლირტის" გამო მამაკაცებსა და ქალებს შორის.

ეს არის პირველი ასეთი ინტერნეტის აკრძალვა მას შემდეგ, რაც "თალიბანმა"" 2021 წელს ავღანეთი ხელში ჩაიგდო, თუმცა თალიბანმა სხვა ზომებიც მიიღო — მათ შორის, გოგონებისთვის საშუალო სკოლის აკრძალვა და ქალებისთვის სხვადასხვა სფეროში მუშაობის შეზღუდვა.

ინტერნეტის აკრძალვა ჩრდილოეთის ხუთ პროვინციას მოიცავს — ქუნდუზს, ბადახშანს, ბაგლანს, ტახარსა და ბალხს.

CNN-ის ცნობით, შეზღუდვა მხოლოდ ოპტიკურ-ბოჭკოვანი კაბელით ინტერნეტკავშირს შეეხება, თუმცა მობილური ტელეფონების ინტერნეტი ხელმისაწვდომი დარჩება.

ცნობისთვის, "თალიბანმა" გასული წლის ბოლოს ოფიციალურად დაამტკიცა მორალის მკაცრი წესები, მათ შორის ქალებისთვის სახის დაფარვის და მამაკაცებისთვის წვერის გაზრდის ვალდებულება, ასევე ავტომანქანის მძღოლებისთვის აკრძალულია მუსიკის ჩართვა.