"ჩვენ ვიწყებთ მშვიდობიან რევოლუციას, მშვიდობიანს მხოლოდ, ქართული დროშებით! ეს იქნება ულამაზესი რევოლუცია, სადაც აუცილებლად გვეყოლება პატარა შვილებიც და შვილიშვილებიც," — ამის შესახებ თორნიკე გოშაძის დედამ, მარიზი კობახიძემ სინდისის სხვა პატიმრების ოჯახის წევრებთან ერთად გამართულ ბრიფინგზე განაცხადა და მოქალაქეებს მოუწოდა 4 ოქტომბერს დაგეგმილ აქციას შეუერთდნენ.

მარიზი კობახიძის განცხადებით, "დაპატიმრებულია ყველა, ვისიც ეშინია ბიძინა ივანიშვილს"

"პირველ რიგში ვიტყვი იმას, რომ ლევან ხაბეიშვილმა გააკეთა ძალიან კარგი განცხადება და მოგვიწოდა მშვიდობიანი რევოლუციისკენ, სადაც, მან აღნიშნა, რომ ეყოლებოდა თავისი შვილები და ჩვენც ასევე მოგვიწოდა, რომ მივსულიყავით შვილებით, შვილიშვილებით. ამის გამო, განცხადების გამო ლევან ხაბეიშვილი დღეს არის დატყვევებული ბიძინა ივანიშვილის მიერ, რადგან, სავარაუდოდ, ბიძინა ივანიშვილს ძალიან ეშინია ხმამაღალი საუბრის და მიუხედავად იმისა, რომ მან განაცხადა, რომ ეს იქნება მშვიდობიანი, ლამაზი, ქართული დროშებიც რევოლუცია, მათ მაინც ვერ გაიგეს ამ რევოლუციის შინაარსი, რევოლუციას ყველაფერს ეძახიან რაღაც საშიშროებას. ამიტომ ჩვენ, პატიმრების ოჯახის წევრები, ყველა, რა თქმა უნდა, მოგიწოდებთ ყველას, საზოგადოებას, მათ, ვინც დგახართ ჩვენს გვერდით, ვინც გვხვდებით ქუჩაში და გვიხუტებთ გულში ჩვენი შვილების გამო, შვილების, ძმების, ცოლების, რა ვიცი, დაპატიმრებულია თითქმის ყველა ქალი და კაცი. დაპატიმრებულები არიან სინდისის ბიჭები, რომლებიც საქართველოსთვის იბრძოდნენ, დაპატიმრებულები არიან პოლიტიკოსები. ყველა ისინი, ვისიც ეშინია ბიძინა ივანიშვილს. ამიტომ, აქ საშიში არაფერი არ არის.

ჩვენ ვიწყებთ მშვიდობიან რევოლუციას, მშვიდობიანს მხოლოდ, ქართული დროშებით! ეს იქნება ულამაზესი რევოლუცია, სადაც აუცილებლად გვეყოლება პატარა შვილებიც და შვილიშვილებიც. საზოგადოებას ვთხოვთ, დაგვიდგეს გვერდით და იყოს ჩვენთან ერთად 4 ოქტომბერს 16:00 საათზე. რუსთაველზე ვიკრიბებით და აუცილებლად 5-ში უნდა ვიზეიმოთ გამარჯვება," — განაცხადა მარიზი კობახიძემ.