ქართული ოცნების თბილისის მერობის კანდიდატმა, კახა კალაძემ ჯანდაცვისა და სოციალური პოლიტიკის მიმართულებით მომდევნო ოთხი წლის განმავლობაში განსახორციელებელი პროექტების წარდგენისას განაცხადა, რომ მისი გუნდი "გასაჭირში პრობლემების პირისპირ არავის ტოვებს"

"ვფიქრობ, ჩვენმა გუნდმა ყველას თვალნათლივ დაანახა, რომ არავის ვტოვებთ გასაჭირში პრობლემების პირისპირ, რომ ვართ ჩვენი მოქალაქეების გვერდით. ეს სწორედ ის მიმართულებაა, სადაც შეუძლებელია, ვინმეს მიმართ გულგრილობა გამოხატო ან ვინმე პოლიტიკური ნიშნით შეაფასო. ჩვენ ვზრუნავთ ჩვენს თანამოქალაქეებზე, განურჩევლად მათი შეხედულებებისა. ჯანდაცვისა და სოციალური პროგრამებით გათვალისწინებული ბენეფიტებით ყოველწლიურად 300 000 ადამიანი სარგებლობს, ფინანსდება ნახევარ მილიონზე მეტი შემთხვევა. მიმდინარე წელს ჯანდაცვისა და სოციალური მომსახურების მიმართულებით გამოყოფილია, დაახლოებით, 106 მლნ ლარი, რომლითაც ამჟამად 31 პროგრამა ხორციელდება", ­­­— თქვა კალაძემ.

თბილისის მერმა განაცხადა, რომ მომდევნო ოთხი წლის განმავლობაში, სოციალური და ჯანდაცვის მიმართულებით, სამი ახალი პროგრამა ამოქმედდება.

"რაც შეეხება მომდევნო ოთხ წელს, სოციალური და ჯანდაცვის მიმართულებით მიმდინარე პროგრამები გაფართოვდება და ამოქმედდება სამი ახალი პროგრამა. ესენია: "ადრეულ ეტაპზე კიბოს სადიაგნოსტიკო კვლევების დაფინანსების" პროგრამა, "ფილტვის კიბოს სკრინინგის დაფინანსების" პროგრამა და "ფარისებრი ჯირკვლის რადიო იოდოთერაპიის დაფინანსების" პროგრამა", — განაცხადა თბილისის მერმა.