ეგვიპტურმა სასამართლომ ქვეყანაში 2013 წელს განვითარებულ მასობრივ არეულობებთან დაკავშირებით 18 ივნისს, 6 პირს, რომელთა შორის ალ ჯაზირას ორი ყოფილი თანამშრომელია, სიკვდილი მიუსაჯა. სიკვდილმისჯილთა შორისაა ეგვიპტელი პროფესორი და ეგვიპტის ავიახაზების ბორტგამცილებელი. ეგვიპტის ხელისუფლება სიკვდილმისჯილებს ყატარის სასარგებლოდ ჯაშუშობას ედავება.

ყატარში, დოჰაში დაფუძნებული ტელეარხის, ალ ჯაზირას ორი თანამშრომელი 2013 წელს დააკავეს, თუმცა, მოგვიანებით საერთაშორისო ზეწოლის შედეგად გაათავისუფლეს. ამჟამად ისინი ეგვიპტეში არ იმყოფებიან, შესაბამისად, ნაკლებსავარაუდოა, რომ განაჩენი აღსრულდეს. რაც შეეხება სხვა სიკვდილმისჯილებს, ისინი ამ დრომდე ეგვიპტის ციხეში იმყოფებიან.

ყატარის ხელისუფლება და ალ ჯაზირა ვერდიქტს პოლიტიკურად მოტივირებულს უწოდებენ. გარდა ამისა, ეგვიპტე უკვე შეფასებულია როგორც ჟურნალისტებისთვის ერთ–ერთი ყველაზე საშიში ადგილი.

სასამართლომ დღესვე 25–წლიანი პატიმრობა მიუსაჯა ეგვიპტის პირველ არჩეულ პრეზიდენტ მოჰამედ მორსის, რომელსაც სახელმწიფო საიდუმლოს გამჟღავნება, ასევე, 2013 წელს მოქალაქეთა დახოცვის ბრძანების გაცემას ედავებიან. მორსის სხვა საქმეებზე ასევე ელის სასიკვდილო განაჩენი. მოჰამედ მორსის ედავებიან ამჟამად აკრძალული პარტიის, მუსლიმთა საძმოს წევრობასაც.

სიკვდილმისჯილებს თავიანთი განაჩენის გასაჩივრება ზემდგომ ინსტანციაში შეუძლიათ, გარდა ამისა, აღნიშნულ განაჩენს ხელი უნდა მოაწეროს ეგვიპტის მთავარმა მუფთიმ. მისი გადაწყვეტილება აღსასრულებლად სავალდებულო არაა, თუმცა, მუფთის აზრს სასამართლო პატივს სცემს და შესაძლოა, განაჩენიც შეიცვალოს.