პოპულარული ამერიკული სიტკომის, შელდონის ბავშვობის (Young Sheldon), ვარსკვლავი რეიგან რევორდი თავის გენდერულ იდენტობაზე ღიად საუბრობს. რევორდი, რომელიც სერიალში მელისა "მისი" კუპერს ასახიერებდა, არაბინარული გენდერული იდენტობის მქონედ დაქამინგაუთდა. ამასთან, 17 წლის მსახიობი გენდერულად ნეიტრალური ნაცვალსახელებით (they/them) სარგებლობს. არაბინარული გენდერული იდენტობა არ განეკუთვნება გენდერის ბინარულ გაგებას, ორობით სისტემას (რომლის მიხედვითაც ნებისმიერი ინდივიდი შეიძლება იყოს ან კაცი, ან ქალი).

უახლეს ინტერვიუში, სადაც რევორდმა თავის სადებიუტო ქვიარ წიგნზეც ისაუბრა, აღნიშნა, რომ მისთვის "უაღრესად მნიშვნელოვანია", თავისი პლატფორმა გამოიყენოს და მაგალითად იქცეს.

"ცოტა უცნაური კია, რომ ვამბობ ბავშვობაში-მეთქი — რადგან მხოლოდ 17 წლის ვარ — მაგრამ თუნდაც 2014 წელს, ათიოდე წლის წინ, როცა აქტიურად კითხვა დავიწყე და ჩემი ხედვის გაფართოებას წაკითხულით თუ ნანახით ვცდილობდი, ქვიარ ამბებს დიდად ვერ შეხვდებოდი", — ამბობს მსახიობი, — "და მაშინ, როცა ქვიარ ან არაბინარული გენდერული იდენტობის მქონე ცნობილ ადამიანს დავინახავდი, მათში საკუთარ თავს ამოვიცნობდი ხოლმე. ახლა კი ალბათ თავად ვარ ეგ ცნობილი ადამიანი და სადღაც ბავშვია, რომელიც ჩემში საკუთარ თავს ხედავს".

შელდონის ბავშვობა, რომელიც 2017 წლიდან 2024 წლამდე გადიოდა ტელეეკრანებზე, ასევე ცნობილი სიტკომის, დიდი აფეთქების თეორიის (The Big Bang Theory), სპინ-ოფია და გვიყვება მისი ერთ-ერთი მთავარი პერსონაჟის, შელდონ კუპერის, ადრეულ წლებზე. სერიალში რევორდი შელდონის ტყუპისცალი დის როლს ასრულებს.

2019 წელს რევორდმა ონლაინ მკითხველთა კლუბიც შექმნა, რომელსაც სოციალურ ქსელებში ასობით ათასი გამომწერი ჰყავს. მსახიობი ბავშვობიდან ბევრს კითხულობს — Young Sheldon-ის ვარსკვლავების თქმით, იგი გადაღებებზეც კი წიგნებით დადიოდა.

"ჩემს ოჯახში ბევრი მასწავლებელი და ბიბლიოთეკარია, ასე რომ, ამას ჩემზე დიდი გავლენა ჰქონდა", — აღნიშნავს რევორდი, — "და რადგან პატარა ასაკიდან ბევრს ვკითხულობდი და სულ წიგნების სამყაროში ვიყავი, როგორც თავადაც მკითხველმა, ვიცოდი, სხვებს რა უნდოდათ".

ეს რაღაც კი ახალგაზრდა ტელევარსკვლავის სადებიუტო რომანია — Rules for Fake Girlfriends (წესები მოჩვენებითი შეყვარებულებისთვის) — რომელიც სულ რამდენიმე დღის წინ გამოიცა. რევორდის თქმით, თავდაპირველად სურდა, წიგნი ფენტეზის ჟანრში დაეწერა, მაგრამ საბოლოოდ რომანტიკული კომედია გადაწყვიტა, ამისკენ კი პოპულარულმა კომიქსმა Heartstopper-მა და მისმა ეკრანიზაციამ უბიძგა.

"Heartstopper ზუსტად ასახავს ოჯახურ და მეგობრულ ურთიერთობებს, ქვიარ ახალგაზრდობის ყოველდღიურობას, და ვფიქრობ, ეს ძალიან მნიშვნელოვანია", — ამატებს რევორდი, — "ეს ამბავი ძალიან მიყვარდა და სულ მინდოდა, თავადაც მსგავსი დამეწერა".