ოცნების პარლამენტმა პარტიის გახარია საქართველოსთვის 12 წევრის უფლებამოსილება ცნო. გახარიას გუნდს სხვა ბარიერგადალახული პარტიებისგან განსხვავებით, საარჩევნო სია არ ჩაუხსნია, შესაბამისად ოცნების პარლამენტს შესაძლებლობა მიეცა, უფლებამონაცვლეთა ცნობის საკითხი დაეყენებინა, რასაც პლენარულ სხდომაზე მხარი დაუჭირეს.

გახარიას პარტიის საარჩევნო სიის მიხედვით, ოცნების პარლამენტის გამოკლებული წევრის დიმიტრი ცქიტიშვილის ადგილმონაცვლე არის გელა აბულაძე, ანა ბუჩუკურის ადგილმონაცვლე — ჯემალ ანანიძე, ბექა ლილუაშვილის ადგილმონაცვლე — ქეთევან ბაკარაძე, ბერდია სიჭინავას ადგილმონაცვლე — რუსუდან თევზაძე, თეონა აქუბარდიას ადგილმონაცვლე — მალხაზ თორია, ნათია მეზვრიშვილის ადგილმონაცვლე — შალვა კერესელიძე, ლევან გოგიჩაიშვილის ადგილმონაცვლე — სალომე კობალაძე, გიორგი გახარიას ადგილმონაცვლე — გიგა ფარულავა, ზვიად ძიძიგურის ადგილმონაცვლე — ვიკა ფილფანი, როინ ქოჩორაშვილის ადგილმონაცვლე — გიორგი შარაშიძე, კახა ქემოკლიძის ადგილმონაცვლე — თამარ ხვედელიანი, ხოლო ზაზა თავაძის ადგილმონაცვლე — სოფიო ხორგუანი.

პარტია გახარია საქართველოსთვის დეპუტატები ოცნების XI მოწვევის პარლამენტში სხდომებს პროტესტის ნიშნად არ ესწრებოდნენ, რის გამოც სხდომების არასაპატიო მიზეზით გაცდენის საფუძვლით 2 ივლისს უფლებამოსილება შეუწყდათ.

რაც შეეხება სხვა ბარიერგადალახულ ოპოზიციურ პარტიებს, მათ არჩევნების შედეგების გამოცხადებიდან მალევე ჩახსნეს საარჩევნო სიები და მანდატებზე უარი თავადვე თქვეს. დეპუტატის უფლებამოსილება ჯამში 61 ოპოზიციონერ წევრს შეუწყდა.