"გამომდინარე ქალბატონი დანიგანის უშუალო კავშირებიდან, გვაქვს ეჭვი, რომ ეს გზავნილი მოდიოდა სწორედ იმ დანაყოფიდან, სახელმწიფო დეპარტამენტში, რომელიც მოქმედებს კვლავაც "დიფ სთეითის" გავლენით," — ამის შესახებ ოცნების პრემიერმა ირაკლი კობახიძემ სამთავრობო "რუსთავი 2"-ის ეთერში განაცხადა და გამოეხმაურა 2025 წლის 28 მაისს ამერიკის შეერთებული შტატების მიერ გავრცელებულ განცხადებას, რომლის მიხედვითაც "ბიძინა ივანიშვილმა უარი თქვა ელჩ დანიგანთან შეხვედრაზე, სადაც მას ტრამპის ადმინისტრაციის გზავნილი უნდა მოესმინა".

კობახიძის თქმით, "გაუგებარია, რატომ თქვეს უარი ელჩმა და შესაბამისმა პირებმა, მაგალითად, პრემიერმინისტრისთვის ამ გზავნილის გადმოცემაზე", მაშინ როცა, მისი თქმით, ინფორმაცია ყველა შემთხვევაში მაინც მიაღწევდა ბიძინა ივანიშვილამდე

"რაც შეეხება ამერიკულ გზავნილს, ჩვენ არ ვიცით, ზუსტად, რა მისამართიდან მოდიოდა ეს გზავნილი, გამომდინარე ქალბატონი დანიგანის უშუალო კავშირებიდან, გვაქვს ეჭვი, რომ ეს გზავნილი მოდიოდა სწორედ იმ დანაყოფიდან, სახელმწიფო დეპარტამენტში, რომელიც მოქმედებს კვლავაც "დიფ სთეითის" გავლენით. ამას ამყარეს რა — ჩვენი პასუხი, ბიძინა ივანიშვილის პასუხი იყო საჯარო, მან განაცხადა, შემდეგი რამ: ბიძინა ივანიშვილი არის შანტაჟის ქვეშ, პირდაპირი ფინანსური ინსტრუმენტები გამოიყენება. არა მარტო ფინანსური, სანქციები, მანამდე იყო დე ფაქტო სანქციები, ფინანსების გაჩერება. ბატონი ბიძინა ივანიშვილი დღეს მოქმედებს შანტაჟის ქვეშ. რაც შეეხება ხელისუფლების ლიდერებს, პრემიერმინისტრს და სხვებს, ჩვენს შემთხვევაში ანალოგიური ტიპის შანტაჟი არ მოქმედებს. ჩვენ არ ვართ არც ფორმალური არც არაფორმალური სანქციების ქვეშ. ამიტომ ჩვენთვის გაუგებარი უნდა იყოს ბუნებრივია, რატომ თქვეს, ელჩმა და შესაბამისმა პირებმა უარი მაგალითად, პრემიერმინისტრისთვის ამ გზავნილის გადმოცემასა და გაზიარებაზე. რა თქმა უნდა ეს გზავნილი ყველა შემთხვევაში მიაღწევდა ბიძინა ივანიშვილამდე ხომ? ამის პრობლემა არ იყო," — განაცხადა კობახიძემ.

მისივე თქმით, როგორც ჩანს, მიზანი იყო, რომ "სწორედ იმ ადამიანისთვის გაეზიარებინა არა აშშ-ის, არამედ ამ შემთხვევაში "დიფ სთეითს" გზავნილი, რომელიც სწორედ შანტაჟის ქვეშ იმყოფება".

ამერიკის შეერთებული შტატების მიერ 2025 წლის 28 მაისს გავრცელებული განცხადება:

"ბიძინა ივანიშვილმა უარი თქვა ელჩ დანიგანთან შეხვედრაზე, სადაც მას ტრამპის ადმინისტრაციის გზავნილი უნდა მოესმინა. სახელმწიფო მდივან რუბიოს თხოვნით, 22 მაისს, ელჩმა დანიგანმა ბიძინა ივანიშვილთან შეხვედრა ითხოვა, რათა შეეტყობინებინა ადმინისტრაციის გზავნილი და კიდევ ერთხელ გადაეცა კონკრეტული ნაბიჯების შესახებ, რომელთა გადადგმაც საქართველოს მთავრობას შეუძლია იმის საჩვენებლად, რომ სერიოზულად არის განწყობილი შეერთებულ შტატებთან ურთიერთობის გადატვირთვის მიმართ. იმედი გვაქვს, საქართველოს მთავრობას გულწრფელად სურს ამერიკასთან და ამერიკელ ხალხთან 33-წლიან პარტნიორობასა და მეგობრობას დაუბრუნდეს," — აღნიშნულია განცხადებაში.

ასევე იხილეთ: