"მას შემდეგ, რაც თვითმმართველობის არჩევნებში მონაწილეობაზე დაიწყო მსჯელობა, ჩვენი პოლიტიკური გზები გაიყო და განსხვავებული ხედვები ჩამოყალიბდა" — ამის შესახებ პარტია გახარია საქართველოსთვის წევრი ელგუჯა ხოკრიშვილი სოციალურ ქსელში წერს.

როგორც ხოკრიშვილი აღნიშნავს, ის ვერ ხედავს რეალურ პოლიტიკურ შედეგს ამ პროცესში ჩართვით, გარდა რეჟიმის ნორმალიზაციისა.

მისი განცხადებით, ერთადერთი გზა ამ ტიპის რეჟიმის იზოლირებისთვის არის აქტიური ბოიკოტი და სამოქალაქო პროტესტის გაფართოება

"2024 წლის ოქტომბრის არჩევნებში მონაწილეობა მივიღე პარტია საქართველოსთვის სიით. მას შემდეგ, რაც თვითმმართველობის არჩევნებში მონაწილეობაზე დაიწყო მსჯელობა, ჩვენი პოლიტიკური გზები გაიყო და განსხვავებული ხედვები ჩამოყალიბდა.

კატეგორიულად წინააღმდეგი ვარ, რომელიმე ოპოზიციური პარტიის თვითმმართველობის არჩევნებში მონაწილეობის. ვერ ვხედავ რეალურ პოლიტიკურ შედეგს ამ პროცესში ჩართვით, გარდა რეჟიმის ნორმალიზაციისა.

ერთადერთი გზა ამ ტიპის რეჟიმის იზოლირებისთვის არის აქტიური ბოიკოტი და სამოქალაქო პროტესტის გაფართოება, შიდა და გარე ზეწოლა, ქუჩის პროტესტი, საერთაშორისო სანქციები და პოლიტიკური დელეგიტიმაცია.

ქვეყანაში პოლიტიკური დევნა უკვე მასობრივ ფაზაში გადავიდა. ოპოზიციური ლიდერების დაჭერები, მედიის ტერორი და სამოქალაქო აქტივისტების დევნა რუსული წესრიგის ანალოგი გახდა.

რუსეთის გავლენა საქართველოში აღარ არის ფარული. ის აშკარად იგრძნობა კანონებში, რეპრესიებში, პროპაგანდაში და საერთაშორისო ურთიერთობების სრულ კრახში.

ამ პირობებში არავის აქვს უფლება კომფორტის ზონაში დარჩეს. ქვეყანას გეოპოლიტიკურად რუსეთი იწოვს, პოლიტიკური ოპოზიციის მნიშვნელოვანი ნაწილი ციხეშია. ეს არის ბრძოლა თავისუფლების, დამოუკიდებლობისა და დასავლური არჩევანის დასაცავად.

ამ ბრძოლაში ნეიტრალიტეტი უკვე პოზიციაა. თუ სისტემა არ ჩამოიშლება, არც ერთ პოლიტიკურ ქმედებას, მათ შორის ფსევდო არჩევნებში მონაწილეობას, არ აქვს აზრი.

ბრძოლა ბოლომდე ქვეყნის შიგნით და გარეთ. ვისაც რა შეგვიძლია, ვის ქვეყნის შიგნით და ვის ქვეყნის გარეთ, ეს ბრძოლა უნდა გავაგრძელოთ რეჟიმის ჩამოშლამდე" — წერს ელგუჯა ხოკრიშვილი.

შეგახსენებთ, ადგილობრივ თვითმმართველობის არჩევნებში მონაწილეობაზე უარს ამბობს 8 ოპოზიციური პარტია. ბოიკოტის რეჟიმში მყოფი ლიდერები ამბობენ, რომ ამ პროცესში მონაწილეობა 2024 წლის საპარლამენტო არჩევნების აღიარებას და ოცნების ხელისუფლებისთვის ლეგიტიმაციის მინიჭებას ნიშნავს. არჩევნებში მონაწილეობას იღებს გახარია საქართველოსთვის. ინფორმაცია პარტიის თავმჯდომარემ გიორგი გახარიამ გუშინ, 2 ივლისს, წულუკიანის კომისიაზე კიდევ ერთხელ დაადასტურა. თვითმმართველობის არჩევნებში მონაწილეობას აპირებს ლელო - ძლიერი საქართველოც. კოალიციის ლიდერმა მამუკა ხაზარაძემ, რომელიც ამჟამად წულუკიანის კომისიაზე გამოუცხადებლობისთვის პატიმრობაშია, გუშინ, 2 ივნისს, პარტიებს არჩევნებში მონაწილეობისკენ მორიგჯერ მოუწოდა.

"გავაერთიანოთ ძალები თბილისსა და 2024 წელს მოგებულ ქალაქებში ბრძოლის გასამართად. ნუ მივცემთ „ოცნებას“ ყველა დონეზე სისტემური ჩაბეტონების საშუალებას! წინ ახალი არჩევნები გველოდება და იქამდე ბრძოლით მისვლაა საჭირო და არა ბოიკოტით, რომლის სარეალიზაციო გეგმის შედეგი სრულიად ბუნდოვანია" — აღნიშნულია ხაზარაძის წერილში, რომელიც სოციალურ ქსელში, მის პირად გვერდზე გამოქვეყნდა.

ასევე იხილეთ: