საქართველოს ტურიზმის ეროვნული ადმინისტრაციის ინფორმაციით, ტურისტების რაოდენობა 2017 წლის იანვარ-აგვისტოში, წინა წლის ანალოგიურ პერიოდთან შედარებით, 18,9%-ით გაიზარდა. რვათვიან პერიოდში, საერთაშორისო მოგზაურების შემოსვლების საერთო რაოდენობამ 5 056 106-ს შეადგინა, შარშან კი ეს რიცხვი 4 254 843-ის ტოლი იყო.

ვიზიტის ტიპის მიხედვით, ტურისტული მიზნით 2 402 699 შემომსვლელი დაფიქსირდა, რაც წინა წლის ანალოგიური პერიოდის მაჩვენებელზე 29,4%-ით მეტია. 2016 წლის ამავე პერიოდში საქართველოში ტურისტული მიზნით მხოლოდ 1 856 162 მოგზაური შემოვიდა. ეს მაჩვენებელი კი წელს 546 537 ტურისტით გაიზარდა.

ტრანზიტის მიზნით 1 117 569 შემოსვლა დაფიქსირდა, ხოლო ერთ დღიანი ვიზიტების რაოდენობამ 1 538 838-ს შეადგინა.

ამავე კვლევით ირკვევა, რომ საქართველოს ტერიტორიაზე შემომსვლელთა რაოდენობით პირველ ადგილზეა აზერბაიჯანი. 2017 წლის იანვარ-აგვისტოს მონაცემებით, აზერბაიჯანიდან 1 148 484 შემოსვლა დაფიქსირდა, რაც 2016 წლის ამავე პერიოდის მონაცემებთან შედარებით 10,4%-ით (108 493-ით მეტი შემოსვლა) მეტია. აზერბაიჯანიდან შემომსვლელთა რაოდენობა მთლიანი შემოსვლების 22,7%-ს შეადგენს. ამ მხრივ, მეორე ადგილზეა სომხეთი, ხოლო მესამეზე კი - რუსეთი. აღსანიშნავია, რომ რუსეთიდან შემომსვლელთა რაოდენობამ წინა წლის მონაცემებთან შედარებით 33,9%-ით (241 747-ით მეტი შემოსვლა) იმატა.

მეოთხე ადგილზეა თურქეთი, საიდანაც საერთაშორისო შემომსვლელთა რაოდენობამ 6,6% იკლო. გასული წლის ამავე პერიოდში თურქეთიდან 870 773 შემოსვლა დაფიქსირდა, ხოლო 2017 წლის იანვარ-აგვისტოში კი - 813 039.

2017 წლის იანვარ-აგვისტოში მთლიანი შემომსვლელთა რაოდენობის წილი კი ასეთია: მეზობელი ქვეყნებიდან ყველაზე მეტი, მთლიანი შემომსვლელების 79,4% შემოვიდა, ევროკავშირის ქვეყნებიდან 4,4%, ხოლო სხვა რეგიონებზე 16,2% მოდის.

ჯამში, საერთაშორისო მოგზაურების შემოსვლებით, 2017 წლის პირველ კვარტალში, საქართველომ 435 მილიონი ა.შ.შ დოლარი მოგება ნახა, რაც მშპ-ს წილის 6,8%-ს შეადგენს.

კვლევის შედეგების დეტალურად სანახავად ეწვიეთ საქართველოს ტურიზმის ეროვნული ადმინისტრაციის ვებ-გვერდს.

ტურისტების რაოდენობის მნიშვნელოვანი ზრდა შესაძლოა კარგი მინიშნება აღმოჩნდეს იმ ბიზნესმენებისთვის, ვინც ტურიზმის სფეროში საქმიანობთ. ამ სტატისტიკით, შესაძლებელია, რომ თქვენი სამიზნე აუდიტორია უკეთ განსაზღვროთ და გაყიდვების რაოდენობა არსებითად გაზარდოთ.