ბელარუსში ოპოზიციონერი პოლიტიკოსი და ბლოგერი სერგეი ტიხანოვსკი და კიდევ 13 პოლიტპატიმარი პატიმრობიდან გაათავისუფლე — ამის შესახებ ინფორმაციას თავდაპირველად ბელარუსული გამოცემა "ნაშა ნივა" ავრცელებს. სერგეი ტიხანოვსკიმ ბელარუსის ტერიტორია უკვე დატოვა.

პოლიტპატიმრების გათავისუფლება აშშ-ის პრეზიდენტის სპეციალური წარმომადგენლის, კიტ კელოგის მინსკში ვიზიტს უკავშირდება. კელოგი ბელარუსის დედაქალაქს 2025 წლის 21 ივნისს ეწვია და ბელარუსის პრეზიდენტს, ალექსანდრ ლუკაშენკოს შეხვდა. მისი ვიზიტი, სავარაუდოდ, ასევე რუსეთ-უკრაინის ომის კონტექსტში სამშვიდობო მოლაპარაკებების განახლებას უკავშირდება.

პოლიტპატიმრების გათავისუფლების შესახებ განცხადება გააკეთა კელოგის თანაშემწემ, ჯონ კოულმაც:

"პრეზიდენტ ტრამპის ძლიერი ლიდერობის შედეგად დღეს ბელარუსიიდან 14 პატიმარი გაათავისუფლეს. მადლობა ლიეტუვის მთავრობას თანამშრომლობისა და დახმარებისთვის — ისინი ნამდვილ მეგობრებად და მოკავშირედ რჩებიან," — განაცხადა მან.

სვეტლანა ტიხანოვსკაიამ, სერგეი ტიხანოვსკის მეუღლემ, Telegram არხზე გამოაქვეყნა ვიდეო, რომელშიც ქმართან ვილნიუსში შეხვედრაა ასახული.

ვინ არის სერგეი ტიხანოვსკი?

2019 წელს სერგეი ტიხანოვსკიმ შექმნა YouTube-არხი "ქვეყანა სიცოცხლისთვის", რომელიც მალევე ბელარუსის ერთ-ერთი ყველაზე პოპულარული პოლიტიკური არხი გახდა. ის ქვეყნის რეგიონებში აქტიურად მოგზაურობდა, ესაუბრებოდა ადგილობრივებს, იწერდა მათ პრობლემებს და ბელარუსის მთავრობის კრიტიკას სოციალურ მედიაში ავრცელებდა.

2020 წელს , ტიხანოვსკი ბელარუსის პოლიტიკურ პროცესებში ერთ-ერთი მნიშვნელოვანი ფიგურა ხდება. ტიხანოვსკიმ პრეზიდენტობისთვის კენჭისყრის სურვილი გამოთქვა, თუმცა მან კამპანიის დაწყებამდე დოკუმენტების წარდგენაც ვერ მოასწრო, რადგან ის დააპატიმრეს. მის ნაცვლად საპრეზიდენტო კანდიდატად მისი მეუღლე, სვეტლანა ტიხანოვსკაია დარეგისტრირდა.

ტიხანოვსკაიას მხარდამჭერების და მისი გათავისუფლების მსურველი მოქალაქეების რაოდენობა ქვეყნის მასშტაბით უპრეცედენტო რაოდენობის იყო. ორი თვის შემდეგ ლუკაშენკომ საჯაროდ განაცხადა, რომ ტიხანოვსკი მისი მითითებით დააკავეს.

"დიახ, მე გავეცი ბრძანება ტიხანოვსკის წინააღმდეგ. რაღაც არასწორი გავაკეთე? ჩემს ქვეყანაზე ვნერვიულობდი, რომლის წინაშეც დღემდე ვარ პასუხისმგებელი," — თქვა ლუკაშენკომ და მას "მაიდანის ორგანიზების" მცდელობაში დასდო ბრალი.

2021 წლის დეკემბერში, ტიხანოვსკის დახურულ სასამართლო სხდომაზე მკაცრი რეჟიმის კოლონიაში, ოთხი პოლიტიკური ბრალდებით 18-წლიანი პატიმრობა მიუსაჯეს:

• მასობრივი არეულობების ორგანიზება (მუხლი 293, ნაწილი 1);
• სოციალური მტრობის გაღვივება (მუხლი 130, ნაწილი 3);
• ცენტრალური საარჩევნო კომისიის საქმიანობის ხელშეშლა (მუხლი 191, ნაწილი 2);
• საზოგადოებრივი წესრიგის უხეში დარღვევის ორგანიზება (მუხლი 342, ნაწილი 1);

მოგვიანებით, მას დამატებით ერთი წელი და ექვსი თვე მიუსაჯეს, "კოლონიის ადმინისტრაციის მიმართ დაუმორჩილებლობისთვის" — სერგეი ტიხანოვსკი ბრალს არ აღიარებდა.

ტიხანოვკის შესახებ ორი წელზე მეტი ხნის განმავლობაში ინფორმაცია არ ვრცელდებოდა — ის სრულ იზოლაციაში იმყოფებოდა. გათავისუფლების შემდეგ, საზღვარგარეთ მას ელოდნენ შვილები — კარნეი და აგნია — და მეუღლე, სვეტლანა ტიხანოვსკაია. სოციალურ ქსელში სერგეი ტიხანოვსკის დაკავებამდე ფოტოები ვრცელდება, თუ როგორ შეცვალა მან 4 წლიანმა თავისუფლების აღკვეთამ.