საქართველოში თურქეთის ელჩი ზექი ლევენთ გუმრუქჩუმ ტელეკომპანია რუსთავი 2-სთვის მიცემულ ინტერვიუში ისაუბრა იმ ორი პირის შესახებ, რომლებიც ტერორიზმის ბრალდებით იძებნებოდნენ და საქართველოს აფარებდნენ თავს.

ელჩის თქმით, აღნიშნული პირები, თურქეთის მოთხოვნით, ქართველმა სამართალდამცავებმა 2016 წლის გაზაფხულზე დააკავეს და ერთ-ერთი მათგანი უკვე თურქეთშია ექსტრადირებული. რაც შეეხება მეორე პირს, მისი ექსტრადირების პროცედურა ამ დრომდე მიმდინარეობს და ელოდებიან სასამართლოს გადაწყვეტილებას.

ტელეკომპანია რუსთავი 2-ის ინფორმაციით, ვაკეში, მცხეთის ქუჩაზე მდებარე რეზიდენციაში, რომელიც ილია მეორეს ეკუთვნის, 2016 წლის აპრილში, ტერორიზმში, ადამიანების გატაცებასა და მკვლელობაში ბრალდებულ ძებნილებს მალავდნენ. ამის მტკიცებულებად ტელეკომპანია ილია მეორის დაცვის ყოფილ უფროსის, სოსო ოხანაშვილის ჩვენების აუდიოჩანაწერს ავრცელებს.

როგორც რუსთავი 2 ოხანაშვილზე დაყრდნობით ამტკიცებს, აღნიშნულ რეზიდენციაში თურქეთის მოქალაქეები პატრიარქის მდივან-რეფერენტმა შორენა თეთრუაშვილმა და საპატრიარქოს უნივერსიტეტის სამეთვალყურეო საბჭოს თავმჯდომარემ, გიორგი ანდრიაძემ დააბინავეს.

საპატრიარქოს უნივერსიტეტის სამეთვალყურეო საბჭოს თავმჯდომარემ, გიორგი ანდრიაძემ, აღნიშნულ ინფორმაციას სიცრუე უწოდა.

"ინტერნეტშიც დევს მათი განცხადებები, მათი საზეიმო შეხვედრები, სადაც ისინი ყვირიან - გაუმარჯოს ერთიან, დამოუკიდებელ საქართველოს. ესენი არ არიან ისლამისტები. მათ საქართველოს საზღვარი გადმოკვეთეს ოფიციალურად, ანუ ეს იმას ნიშნავს, რომ თურქეთის სახელმწიფომაც გამოუშვა და საქართველომაც მიიღო ისინი. ამ პიროვნებების ტერორისტებად გამოცხადება არის სრული აბსურდი", - განუცხადა ანდრიაძემ ინტერპრესნიუსს.