"მშვიდობის, უსაფრთხოების, სტაბილურობის გარეშე ვერ იქნება ვერანაირი ეკონომიკური წინსვლა. განსაკუთრებული მადლობა ეკუთვნის შსს-ს, პირადად მინისტრს, ბატონ ვახტანგ გომელაურს", — ამის შესახებ მთავრობის სხდომაზე ოცნების ხელისუფლების პრემიერმინისტრმა ირაკლი კობახიძემ 2025 წლის პირველ კვარტალში ეკონომიკურ ზრდაზე საუბრისას თქვა.

მისი თქმით, ეკონომიკურ წინსვლაში განსაკუთრებული წვლილი უსაფრთხოებაზე პასუხისმგებელ უწყებებს მიუძღვის.

"გუშინ გამოქვეყნდა სტატისტიკის ეროვნული სამსახურის მონაცემები. მარტში ეკონომიკურმა ზრდამ შეადგინა 9% და პირველი კვარტლის საერთო მაჩვენებელი არის 9,3%, ასევე პირველ კვარტალში, საგადასახადო შემოსავლების გეგმა შესრულდა 120 მლნ ლარის გადაჭარბებით, რაც ეკონომიკური ზრდის შედეგია. ამისთვის მადლობა მინდა გადავუხადო ჩვენს ეკონომიკურ გუნდს, ჩვენი ერთ-ერთი უმთავრესი პრიორიტეტი არის ქვეყნის ეკონომიკური განვითარების უზრუნველყოფა. ამ მიმართულებით კიდევ ბევრი გვაქვს გასაკეთებელი. გავაგრძელებთ მუშაობას იმისათვის, რომ ეკონომიკური ზრდა კიდევ უფრო მეტად დავაჩქაროთ.

…[ეკონომიკურ წინსვლაში] განსაკუთრებული წვლილი უსაფრთხოებაზე პასუხისმგებელ უწყებებს მიუძღვის. მშვიდობის, უსაფრთხოების, სტაბილურობის გარეშე ვერ იქნება ვერანაირი ეკონომიკური წინსვლა. განსაკუთრებული მადლობა ეკუთვნის შსს-ს, პირადად მინისტრს, ბატონ ვახტანგ გომელაურს", — თქვა კობახიძემ.

ამას გარდა, ირაკლი კობახიძემ ოცნების ხელისუფლების ახალ მინისტრებს — პაატა სალიას, კახა გულედანსა და რეზო სოხაძეს მთავრობის სხდომაზე წარმატებები უსურვა.

ოცნების ხელისუფლების იუსტიციის მინისტრი პაატა სალია, ოცნების ხელისუფლების რეგიონული განვითარების მინისტრი კახა გულედანი და ოცნების ხელისუფლების ინფრასტრუქტურის მინისტრი რევაზ სოხაძე მთავრობის სხდომას დღეს პირველად დაესწრნენ.

"მივესალმები ჩვენს ახალ მინისტრებს - პაატა სალიას, კახა გულედანსა და რევაზ სოხაძეს, რომლებიც პირველად ესწრებიან მთავრობის სხდომას და თითოეულ თქვენგანს მინდა, წარმატებები გისურვოთ თქვენს ძალიან საპასუხისმგებლო პოზიციებზე", — განაცხადა კობახიძემ.