"ინდიგოს" გენერალურმა დირექტორმა, ნატა ძველიშვილმა ფეისბუქ-პოსტში განაცხადა, რომ ჟურნალისტ საბა სორდიას გაურკვეველი მიზეზებით იზოლატორში ყოფნის ვადა გაუგრძელეს.

ნატა ძველიშვილმა NEWS.on.ge-სთან საუბრისას განაცხადა, რომ საბა სორდიასთვის იზოლატორში ყოფნის ვადის გაგრძელების შესახებ მხოლოდ მას შემდეგ გაიგეს, რაც ადვოკატმა ჟურნალისტი იზოლატორში მოინახულა.

"დამატებითი ინფორმაცია არ გვაქვს, მხოლოდ ის ვიცით, რომ კიდევ გაუგრძელეს იზოლატორში ყოფნის ვადა. არც ის ვიცით, როდის იქნება სასამართლო და, შესაბამისად, არანაირი დამატებითი ინფორმაცია არ გვაქვს. არავინ გვეკონტაქტება არც ჩვენ, არც ოჯახის წევრებს, მხოლოდ ადვოკატი არკვევს. ახლა შესული იყო საბა ნახა და ასე გავიგეთ, რომ 48 საათით დამატებით ტოვებენ," — განაცხადა ნატა ძველიშვილმა.

შეგახსენებთ, 6 აპრილს, პოლიციამ "ინდიგოს" ჟურნალისტი საბა სორდია "გადამოწმების მიზნით" "პოლიციისადმი დაუმორჩილებლობის" ბრალდებით დააკავა. ჟურნალისტს ადმინისტრაციულ სამართალდარღვევათა კოდექსის 173-ე მუხლის დარღვევას ედავებიან.

"სოციალური სამართლიანობის ცენტრის" იურისტმა, მარიამ ყველაშვილმა პუბლიკასთან საუბრისას განაცხადა, რომ საბა მარჯანიშვილის მეტროს მიმდებარე ტერიტორიაზე მეგობრებს უნდა შეხვედროდა, რა დროსაც ორმა პოლიციელმა გააჩერა.

იურისტის თქმით, მათ ჟურნალისტს პირადობის მოწმობის ჩვენება მოსთხოვეს, რასაც ის დაემორჩილა. ასევე დაემორჩილა ჩანთის გახსნის მოთხოვნასაც, ჩანთის ერთ-ერთი ჯიბის გახსნაზე კი თქვა, რომ ამას თვითონ გააკეთებდა.