6 აპრილს, პოლიციამ ინდიგოს ჟურნალისტი, საბა სორდია "გადამოწმების მიზნით", "პოლიციისადმი დაუმორჩილებლობის" ბრალდებით დააკავა.

ჟურნალისტს ადმინისტრაციულ სამართალდარღვევათა კოდექსის 173-ე მუხლის დარღვევას ედავებიან.

"სოციალური სამართლიანობის ცენტრის" იურისტმა, მარიამ ყველაშვილმა პუბლიკასთან საუბრისას განაცხადა, რომ საბა მარჯანიშვილის მეტროს მიმდებარე ტერიტორიაზე მეგობრებს უნდა შეხვედროდა, რა დროსაც ორმა პოლიციელმა გააჩერა.

იურისტის თქმით, მათ ჟურნალისტს პირადობის მოწმობის ჩვენება მოსთხოვეს, რასაც ის დაემორჩილა. ასევე დაემორჩილა ჩანთის გახსნის მოთხოვნასაც, ჩანთის ერთ-ერთი ჯიბის გახსნაზე კი თქვა, რომ ამას თვითონვე გააკეთებდა.

"როგორც საბა ამბობს, მარჯანიშვილის მეტროსთან იმყოფებოდა და უნდა შეხვედროდა მეგობრებს, რა დროსაც მასთან მივიდა ორი პოლიციელი და უთხრეს, რომ გადამოწმების მიზნით ითხოვდნენ მის პირადობის მოწმობას. საბას მხრიდან წინააღმდეგობას ადგილი არ ჰქონია. პირადობა მიაწოდა, ამის შემდეგ სთხოვეს, რომ ასევე გაეხსნა ჩანთა, რაზეც დაემორჩილა და ჩანთა გაუხსნა, თუმცა შემდეგ პოლიციელებმა მოინდომეს, რომ თავად გაეხსნათ ჩანთის ერთ-ერთი ჯიბე, რაზეც საბამ უთხრა, რომ თვითონვე გახსნიდა, ამ დროს პოლიციელებმა მოკიდეს მას ხელი, ჩასვეს პოლიციის მანქანაში და წაიყვანეს მარჯანიშვილზე მდებარე პოლიციის განყოფილებაში.

აღსანიშნავია ის გარემოება, რომ დაკავების მომენტში მისთვის არ უთქვამთ, რომ აკავებდნენ და გადაჰყავდათ განყოფილებაში. უკვე განყოფილებაში ყოფნის დროს უთხრეს, რომ ადმინისტრაციული წესით იყო დაკავებული. ასევე საბამ თქვა, რომ საპატრულო პოლიციის მანქანაში ყოფნისას მის მიმართ იყო გამოყენებული ჰომოფობიური სიტყვები, გამომდინარე იქიდან, რომ მას ეკეთა საყურე. ასევე მას ჩამოართვეს GoPro, რომელიც არის ახლა პოლიციაში, საბამ სთხოვა, რომ არ დაკარგულიყო კამერა, რაზეც უთხრეს, რომ თუ კიდევ გაიმეორებდა დაუმტვრევდნენ კამერას. რაც არის პოლიციელის მხრიდან შეუსაბამო საქციელი.

ჩვენ ასევე ვფიქრობთ, რომ მივმართოთ სახალხო დამცველსაც ამასთან დაკავშირებით, მათ შორის ჰომოფობიურ მიმართვასთან დაკავშირებით. რაც შეეხება მისი გამოშვების საკითხს, თუ 48 საათით გაუგრძელებენ, სასამართლოში გადაიყვანენ, ან ხელწერილით გამოუშვებენ ხვალვე. ამ ეტაპზე ვერ გეტყვით" — განაცხადა მარიამ ყველაშვილმა.

ინდიგოს დირექტორმა, ნატა ძველიშვილმა მედიასთან საუბრისას განაცხადა, რომ საბა სორდიას ახლობლებს დაკავების შესახებ არ შეატყობინეს, მას შემდეგ, რაც მეგობრებმა ჟურნალისტის დაგდებული სკუტერი იპოვეს, ამის შემდეგ ძიება დაიწყეს.

"არავინ არ გვეკონტაქტება, მის ახლობლებს არავინ ეკონტაქტება. შემთხვევით გავიგეთ მისი დაკავების შესახებ. მეგობრები ელოდებოდნენ და ნახეს დაგდებული სკუტერი. ასე მივხვდით, რომ ადამიანი გაქრა და დააკავეს. ამის შემდეგ დავიწყეთ ძებნა და პრესსამსახურის დახმარებით გავარკვიე, რომ იზოლატორში იყო. სხვა შემთხვევაში, ალბათ დიდ ხანს უცნობი დარჩებოდა სად გაქრა ადამიანი." — განაცხადა ნატა ძველიშვილმა.

ძველიშვილმა ასევე დასძინა, რომ ჟურნალისტს წარსულშიც წაართვეს კამერა აქციების გაშუქების დროს და ის დღემდე ინდიგოსთვის არ დაუბრუნებიათ.

"მას თან ჰქონდა GoPro ინდიგოს კუთვნილი კამერა, რომელიც ახლა დალუქული არის. ერთხელ მას უკვე ჩამოართვეს კამერა, სპეცრაზმმა აქციების გაშუქების დროს წაართვა. არავის არ დაუბრუნებია, მიუხედავად იმისა, რომ მრავალი თვე გავიდა მას შემდეგ და ახლა არის უკვე მეორე შემთხვევა, რომ მისი კამერა ჩამორთმეულია." — განაცხადა ნატა ძველიშვილმა.