სამთვიანი სამუშაოების შემდეგ, თბილისის მერიამ პეკინის გამზირის რეაბილიტაცია თითქმის დაასრულა. როგორც მერიის კეთილმოწყობის სამსახურში On.ge-ს უთხრეს, საავტომობილო მოძრაობა უკვე აღდგენილია. ამასთან, პეკინზე ორმხრივი მოძრაობა მხოლოდ ავტობუსებისა და სამარშრუტო ტაქსებისთვის დარჩება, ხოლო სხვა სახის ტრანსპორტი მხოლოდ ვაჟა-ფშაველადან გმირთა მოედნის მიმართულებით იმოძრავებს. მისივე თქმით, უახლოეს დღეებში, დაიხაზება საავტობუსო ზოლები, ე.წ. ბასლაინები.

"მიმდინარეობს ტროტუარებზე სამუშაოები, რომლებიც 15 სექტემბერს დასრულდება. დარჩენილია სხვა სამუშაოები, რომლებიც სხვა საქალაქო სამსახურებმა უნდა შეასრულონ - ეს არის ტრანსპორტის და გამწვანების საქალაქო სამსახურები, რომლებიც, სავარაუდოდ, 2 კვირის განმავლობაში იმუშავებენ კიდევ", - ამბობს კეთილმოწყობის სამსახურის უფროსი, გივი კუბლაშვილი On.ge-სთან საუბრისას.

კუბლაშვილის თქმით, პეკინზე ველობილიკებისა და შშმ პირებისთვის გადასასვლელების მოწყობა 15-16 სექტემბრისთვის დასრულდება.

პეკინის გამზირზე სარეაბილიტაციო სამუშაოები 16 ივნისს დაიწყო.