"ამ თემატიკას საქართველოსთან არანაირი კავშირი არ აქვს", — ასე გამოეხმაურა ოცნების დეპუტატი დავით მათიკაშვილი "ტვ პირველის" ჟურნალისტის კითხვას — აშშ-ს პრეზიდენტის, დონალდ ტრაპის მიერ Megobari Act-ის წარმდგენი სენატორის, ჯიმ რიშისთვის მხარდაჭერის გამოხატვაზე.

"გავეცანი ამ პოსტს და თუ არ ვცდები აშშ-ს პრეზიდენტი კონკრეტულ კონგრესმენისთვის არ იშურებს კეთილ სიტყვას იმ შტატთან დაკავშირებით, რომელსაც წარმოადგენს ეს კონგრესმენი და სადაც დონალდ ტრამპმა არჩევნებზე მაღალი რეიტინგი აჩვენა. ეს არის შეერთებულ შტატების შიდა საქმეები და შიდა მოცემულობა, რომელიც ყველაზე კარგად იციან შეერთებული შტატების პრეზიდენტმა და კონგრესმა, რასაც ბუნებრივია საქართველოსთან არანაირი კავშირი არ აქვს.

ჩვენ შეერთებულ შტატებთან გვაქვს არსებითად ურთიერთობების გადატვირთვის იმედი და ჩვენ პირველ რიგში ვუსურვებთ მათ დიფ სთეითის დამარცხებას", — თქვა მათიკაშვილმა.

შეგახსენებთ, რომ აშშ-ის პრეზიდენტი დონალდ ტრამპი სრულ მხარდაჭერას უცხადებს Megobari Act-ის თანაავტორ, საქართველოს მხარდამჭერ სენატორ ჯიმ რიშს. ამის შესახებ ტრამპი TruthSocial-ზე წერს.

"სენატორი ჯიმ რიში უზარმაზარ საქმეს აკეთებს, რომელიც წარმოადგენს აიდაჰოს შესანიშნავ ხალხს, შტატის რომელიც მიყვარს და დიდი გამარჯვება მოვიპოვე 2016, 2020 და 2024 წლებში!

როგორც სენატის საგარეო ურთიერთობათა კომიტეტის თავმჯდომარე, ჯიმი დაუღალავად იბრძვის ჩვენი დღის წესრიგის წინსვლისთვის. ის ბევრს მუშაობს ჩვენი ეკონომიკის ზრდისთვის სამუშაო ადგილების შესაქმნელად, მტკიცედ უჭერს მხარს ჩვენს ფერმერებს, ცდილობს გახადოს ამერიკის ენერგეტიკა ჩემპიონი და დომინანტი, დაიცვას ჩვენი საზღვრები, გააძლიეროს ჩვენი სამხედროები და ვეტერანები, დაიცვას მუდმივი თავდასხმის ქვეშ მყოფი კონსტიტუციის მეორე შესწორება და აღადგინოს მშვიდობა სიძლიერის წყალობით.

სენატორ ჯიმ რიშს ჩემი სრული და აბსოლუტური მხარდაჭერა აქვს ხელახლა არჩევისთვის, ის გამორჩეული კაცია და არასდროს დაგაღალატებთ", — წერს დონალდ ტრამპი.

ცნობისათვის, 27 მარტს, ამერიკის შეერთებული შტატების სენატის საგარეო საქმეთა კომიტეტი Megobari Act-ს განიხილავს.

22 მარტს, 20:00 საათზე, კი თბილისში Megobari Act-ის მხარდამჭერი მარში გაიმართება. მოქალაქეები მარჯანიშვილის მოედანზე შეიკრიბებიან და მსვლელობით პარლამენტისკენ წავლენ.