დედაქალაქის მერი, კახი კალაძე, ლელო — ძლიერი საქართველოს ერთ-ერთი ლიდერის, საბა ბუაძის განცხადებას გამოეხმაურა იმის შესახებ, რომ სავალდებულო ნარკოშემოწმების წესში ცვლილებების შეტანის ნაცვლად, თავად ოცნების ხელისუფლების წარმომადგენლებმა უნდა გაიარონ ნარკოშემოწმება და საზოგადოებას წარუდგინონ შედეგები.

კალაძის თქმით, ის მზად არის, ნებისმიერ დროს ჩაიტაროს ნარკოლოგიური ტესტირება და არ აპირებს "გიორგი გახარიასავით გაქცევას".

"ნებისმიერ დროს, თუმცა საბა ბუაძესთან დაკავშირებით, მე ჩემი დამოკიდებულება მაქვს. ამ შემთხვევაში, აბსოლუტურად ვიზიარებ ერთ-ერთი პოლიტიკოსის განცხადებას და დამოკიდებულებას საბა ბუაძესთან დაკავშირებით. ნებისმიერ დროს [მზად ვარ], გახარია ხომ არ ვარ გავიქცე და დავიმალო?!" — განაცხადა კალაძემ.

მისივე თქმით, "ქართული ოცნების" მიერ დაანონსებულ ნარკოპოლიტიკის გამკაცრების მიზანი ნარკოდამოკიდებულ ადამიანებს დახმარება და ჯანსაღი ცხოვრების პოპულაციაა.

"რაც შეეხება რეფორმას, ამ მიმართულებით არსებობს გამოწვევები. ჩვენ გვინდა რეფორმის განხორციელება, რითაც ადამიანებს დავეხმარებით, მივცემთ შესაძლებლობას, თუნდაც მაგალითად: ხელი შევუწყოთ ჯანსაღი ცხოვრების წესის პოპულარიზაციას, ჯანსაღი ცხოვრების წესის დანერგვას, ნარკოდამოკიდებულ ადამიანებს დავეხმაროთ და მხარში ამოვუდგეთ. ზოგადად, ნარკოტიკების მიმართ შეიცვალოს დამოკიდებულება," — აღნიშნა კალაძემ.

ცნობისთვის, ლელო - ძლიერი საქართველოს ერთ-ერთმა ლიდერმა, საბა ბუაძემ ქართული ოცნების წარმომადგენლებს მოუწოდა, რომ "სავალდებულო ნარკოშემოწმების წესში ცვლილებების შეტანის ნაცვლად, თავად გაიარონ ნარკოშემოწმება და საზოგადოებას წარუდგინონ შემოწმების შედეგები" და ქართული ოცნებას ურჩია, შემოწმება კახა კალაძით დაეწყოთ.

შეგახსენებთ, ქართული ოცნება ნარკოტიკებთან, მათ შორის მცენარე კანაფთან და მარიხუანასთან დაკავშირებულ ქმედებებზე პასუხისმგებლობის გამკაცრებას გეგმავს. გამკაცრებული პოლიტიკა ნარკორეალიზატორებისთვის მცირე ოდენობით ნარკოტიკის გაყიდვისთვისაც კი 12-დან 20 წლამდე ან უვადო პატიმრობას გულისხმობს.