უკრაინასა და ამერიკის შეერთებულ შტატებს შორის ურთიერთობების გამწვავებამდე უკრაინელების 57% ენდობოდა უკრაინის პრეზიდენტს ვლადიმირ ზელენსკის, ხოლო 14 თებერვლიდან 4 მარტამდე მისდამი ნდობის დონე 67%-მდე გაიზარდა. ამის შესახებ კიევის სოციოლოგიის საერთაშორისო ინსტიტუტის კვლევაშია ნათქვამი.

კვლევის მიხედვით, თებერვლის პირველი ნახევრისთვის, უკრაინასა და აშშ-ს შორის ურთიერთობების გამწვავებამდე, უკრაინელების 57% ენდობოდა ზელენსკის, ხოლო 37% არ ენდობოდა. ამრიგად, ნდობა-უნდობლობის ბალანსი +20% იყო.

"შემდეგ, 2025 წლის 14 თებერვლიდან 4 მარტამდე პერიოდში, ნდობის დონე გაიზარდა 67%-მდე, ხოლო ვინც არ ენდობა იმის მაჩვენებელი — 29%-მდე შემცირდა. შესაბამისად, ნდობა-უნდობლობის ბალანსი გაუმჯობესდა +38%-მდე", — აჩვენა კვლევამ.

აღნიშნულია, რომ 14 თებერვლიდან 4 მარტამდე ბევრი რეზონანსული მოვლენა მოხდა, კერძოდ, 28 თებერვალს თეთრ სახლში აშშ-ს პრეზიდენტ დონალდ ტრამპთან "ემოციური შეხვედრა".

სოციოლოგების აზრით, 14-28 თებერვლის პერიოდში ნდობა 4-9 თებერვალთან შედარებით გაიზარდა, ხოლო 1-4 მარტიდან ზელენსკის მიმართ ნდობა 68%-მდე გაიზარდა. უნდობლობა 1-4 მარტის პერიოდში 27% იყო, ხოლო ნდობა-უნდობლობის ბალანსი 1-4 მარტის პერიოდში +41%.

"ძალიან მსგავსი სიტუაციაა უკრაინის ყველა რეგიონში და ნდობისა, უნდობლობის ბალანსი დადებითია. პრეზიდენტისადმი ნდობა ოდნავ დაბალია უკრაინის აღმოსავლეთში, მაგრამ ამ რეგიონშიც კი უმრავლესობა ენდობა ზელენსკის: 60% ენდობა და 36% არ ენდობა. სხვა რეგიონებში (დასავლეთი, ცენტრი, სამხრეთი) 66-69% ენდობა და 28-30% არ ენდობა," — ამბობს KIIS-ის აღმასრულებელი დირექტორი ანტონ გრუშეცკი.

მისი თქმით, პრეზიდენტისადმი ნდობის ზრდა ბოლო პერიოდში მიუთითებს იმაზე, რომ ჩვენ ახლა ვხედავთ "დროშის ირგვლივ გაერთიანებას".

"ნებისმიერ შემთხვევაში, მნიშვნელოვანია ხაზგასმით აღვნიშნო, რომ პრეზიდენტისადმი ერთიანობისა და ნდობის გაზრდის მთავარი მიზეზი არ არის მასზე თავდასხმები. უკრაინელები აშშ-ის ახალი მთავრობის რიტორიკას აღიქვამენ, როგორც თავდასხმას მთელ უკრაინაზე და ყველა უკრაინელზე", — აღნიშნა მან.

14 თებერვლიდან 4 მარტის პერიოდში KIIS-მა ჩაატარა საზოგადოებრივი აზრის გამოკითხვა, რომელსაც საკუთარი ინიციატივით დაუმატა კითხვა ზელენსკისადმი ნდობის შესახებ. უკრაინის ყველა რეგიონში სულ 1029 რესპონდენტი გამოიკითხა სატელეფონო ინტერვიუების გამოყენებით.

გამოკითხვა 18 წელზე უფროსი ასაკის უკრაინის მოქალაქეებს შორის ჩატარდა, რომლებიც კვლევის დროს უკრაინის მთავრობის მიერ კონტროლირებად უკრაინის ტერიტორიაზე ცხოვრობდნენ. კვლევა არ მოიცავდა იმ ტერიტორიების მაცხოვრებლებს, რომლებსაც დროებით არ აკონტროლებს უკრაინის ხელისუფლება (ამავდროულად, ზოგიერთი რესპონდენტი ოკუპირებული ტერიტორიებიდან გადმოსახლებული იძულებით გადაადგილებული პირია) და გამოკითხვა არ ჩატარებულა იმ მოქალაქეებს შორის, რომლებმაც ქვეყანა დატოვეს 2022 წლის 24 თებერვლის შემდეგ.

კვლევის ავტორების თქმით, ფორმალურად, ასეთ კვლევაში სტატისტიკური ცდომილება 1.8%-დან 4.1%-მდეა.