პოლონეთის შინაგან საქმეთა მინისტრმა ტომაშ სიემონიაკმა დაადასტურა, რომ მძიმე დანაშაულის ჩამდენი უცხოეთის ქვეყნების მოქალაქეები პოლონეთიდან დეპორტირდებიან. ამის შესახებ პოლონური მედია წერს.

პოლონეთის პრემიერმინისტრ დონალდ ტუსკის თქმით, პოლონეთში დაკავებული უცხოელი დამნაშავეების პირველი დეპორტაცია მათი წარმოშობის ქვეყნებში, მათ შორის: საქართველოში, მარტის პირველ კვირაში განხორციელდება.

პრემიერმინისტრმა TVN24-ის ეთერში განაცხადა, რომ დეპორტაციისთვის, რა თქმა უნდა, საჭიროა შეთანხმება იმ ქვეყნებთან, სადაც პოლონეთში დაკავებული უცხოელები უნდა გაიგზავნონ.

ბოლო დროს, პოლონეთში დანაშაულებრივი ბანდების მიერ ჩადენილი კრიმინალური აქტივობების ზრდაა. მინისტრ ტომაშ სიემონიაკის თქმით, კრიმინალების დეპორტაციისთვის ფრენების მომზადება დაიწყება, ზოგიერთ უცხოელს კი პოლონეთში გაასამართლებენ.

"თავდასხმები, ძარცვა, მკვლელობები — ეს ყველაფერი შედის დანაშაულთა ამ კატალოგში. რაც შეეხება ეროვნებებს, თითოეულ შემთხვევაში საუბარია პოლონეთში მცხოვრებ უმცირესობებზე, ყველაზე ხშირად ესენი არიან უკრაინის და საქართველოს მოქალაქეები. უკრაინის მოქალაქეების შემთხვევაში ეს აიხსნება იმით, რომ პოლონეთში დაახლოებით 2 მილიონი უკრაინელი ცხოვრობს", — აღნიშნა ტომაშ სიემონიაკმა.

პოლონეთის შინაგან საქმეთა მინისტრის თქმით, ყველა გადაწყვეტილება უცხოელების დეპორტაციის შესახებ, რომლებიც კანონს არღვევენ, ინდივიდუალურად განიხილება.