ოცნების პარლამენტმა ამერიკული FARA-ს ქართულენოვანი თარგმანი — "უცხოელი აგენტების რეგისტრაციის აქტი" დაარეგისტრირა. საკანონმდებლო ინიციატივის ავტორია ფრაქცია ქართული ოცნება.

"ამ საკანონმდებლო ინიციატივის არსი ის არის, რომ იგი წარმოადგენს ამერიკული „ფარას“ სიტყვა-სიტყვით თარგმანს. შემდეგში, საპარლამენტო განხილვის პროცესში, მოხდება კანონპროექტის შესაბამისი ტერმინოლოგიის ქართულ სამართლებრივ სივრცესთან შესაბამისობაში მოყვანა. ამ საკანონმდებლო ინიციატივის წარმოდგენით, ნებისმიერი ყალბი, ცრუ ნარატივი, რომელსაც შიგნიდან თუ გარედან ავრცელებდნენ ქართულ კანონებთან დაკავშირებით, დასრულებულია. შესაბამისად, დასრულდება ნებისმიერი სპეკულაცია, თითქოს საქართველოს პარლამენტი მიიღებს კანონს, რომელიც საერთაშორისო სტანდარტს არ შეესაბამება", - განაცხადა პარლამენტის თავმჯდომარე შალვა პაპუაშვილმა.

საკანონმდებლო ინიციატივა განსახილველად იურიდიულ საკითხთა კომიტეტს გადაეცა.

იურიდიულ საკითხთა კომიტეტის თავმჯდომარის, არჩილ გორდულაძის განმარტებით, გუნდის მიერ მიღებულია პოლიტიკური გადაწყვეტილება სიტყვა-სიტყვით ნათარგმნი ამერიკული კანონის ინიციირების შესახებ, რათა კანონთან დაკავშირებით არანაირი გაუგებრობა არ იყოს. მისივე თქმით, რა თქმა უნდა, დამატებით მთელ რიგ კანონებში საჭირო გახდება ცვლილებების შეტანა, რათა განისაზღვროს ის ორგანოები, რომლებიც საქართველოს რეალობიდან გამომდინარე პასუხისმგებელი იქნებიან კანონის აღსრულებაზე.

"ჩვენ პოლიტიკური გადაწყვეტილება მივიღეთ, რომ სიტყვა სიტყვით ნათარგმნი ამერიკული კანონი დაინიციირებულიყო იმისთვის, რომ მერე აღარ ყოფილიყო საუბარი, თარგმანში დაკარგვების მცდელობები. რა თქმა უნდა, რიგ კანონებს დასჭირდება ცვლილებები, მაგრამ იმისთვის, რომ იყოს სამსჯელოდ შემოტანილი, რომ დიახ, აი, ეს არის ქართულად ნათარგმნი, თუ ვინმეს რამე პრეტენზია გაქვთ თარგმანთან დაკავშირებით, წარმოადგინეთ.

რაც შეეხება აღმასრულებელ ორგანოებს, საჭირო იქნება იმ ორგანოების განსაზღვრა ჩვენი რეალობიდან გამომდინარე, რომლებიც ამ კანონის აღსრულებაზე იქნებიან. მაგალითად, აშშ-ის პრეზიდენტიც კი ვთარგმნეთ და დეპარტამენტის ხელმძღვანელიც, რომ ინსინუაციები არ გამოეწვია თითოეულ სიტყვას", — განაცხადა იურიდიულ საკითხთა კომიტეტის თავმჯდომარემ, არჩილ გორდულაძემ.