ევროკომისიის ყოფილი ვიცე-პრეზიდენტი ჯოზეფ ბორელი დონალდ ტრამპის განცხადებებს ეხმაურება იმის შესახებ, რომ ზელენსკი დიქტატორია, უკრაინისთვის ომის აცილება შეეძლო და 4%-ის მხარდაჭერა აქვს.

"უსინდისობის მწვერვალია ზელენსკისთვის იმის დაბრალება, რომ მან რუსეთის წინააღმდეგ ომი დაიწყო, დიქტატორია, უკრაინელების მხოლოდ 4%-ის მხარდაჭერა აქვს და უკრაინის მინერალური რესურსების მიტაცება სურს დახმარების სანაცვლოდ.

ზელენსკის სათავეში უდგას თავისი ქვეყნის წინააღმდეგობას, რომელსაც თავს დაესხა რუსეთი და იმსახურებს პატივისცემას, ცილი რომ არ დასწამოს იმ ქვეყნის პრეზიდენტმა, რომელიც ჯერ კიდევ გუშინ მისი მთავარი მხარდამჭერი იყო", — წერს X-ზე ჯოზეფ ბორელი.

19 თებერვალს აშშ-ის პრეზიდენტმა, დონალდ ტრამპმა სოციალურ ქსელში ვრცელი პოსტი გამოაქვეყნა, რომელიც სრულად უკრაინის პრეზიდენტის, ვოლოდიმირ ზელენსკის კრიტიკას მიეძღვნა. ტრამპმა ზელენსკის დიქტატორიც კი უწოდა და არჩევნების დანიშვნისკენ მოუწოდა.