პარლამენტში თეა წულუკიანის ხელმძღვანელობით დღეს მუშაობა დაიწყო "ნაციონალური მოძრაობის საქმიანობის შემსწავლელმა კომისიამ".

თეა წულუკიანის განცხადებით, გამოძახების შემთხვევაში, კომისიის წინაშე გამოცხადება სავალდებულოა და წინააღმდეგ შემთხვევაში, კანონით გათვალისწინებულია სასჯელიც.

"საგამოძიებო კომისიისთვის უნდობლობის გამოცხადების ინსტიტუტს არ ცნობს საქართველოს კანონმდებლობა. კანონმდებლობა იცნობს მხოლოდ ერთ რამეს - როდესაც კომისია გიბარებს, მის წინაშე უნდა გამოცხადდე.

[...] მოვიდნენ ღირსეულად, წავლენ კომისიიდანაც ღირსეულად. წინააღმდეგ შემთხვევაში, კანონი არის ძალიან მკაცრი, მე ამაზე მეტს არ ვამბობ არაფერს, რომ არ გააფორმოს ვინმემ მუქარად, მაგრამ საკმარისზე მეტს კი ვამბობ იმისთვის, რომ ყველა დაფიქრდეს, ითანამშრომლებს თუ არა ჩვენს კომისიასთან. ჩვენ არ ვხუმრობთ და ცეცხლს ნურავინ გაეთამაშება", — განაცხადა თეა წულუკიანმა.

კომისიის 2012 წელს ქართული ოცნების ხელისუფლებაში მოსვლიდან 12 წლის შემდეგ დაწყების მიზეზზე საუბრისას, სამთავრობო ოპოზიცია ხალხის ძალის წარმომადგენელმა სოზარ სუბარმა აშშ-ში ჯონ კენედის მკვლელობის გამოძიების მაგალითი მოიშველია.

"60 წლის წინ მოხდა ჯონ ფიცჯერალდ კენედის მკვლელობა და ტრამპი ამბობს, რომ ახლა უნდა გასცეს ყველა კითხვას პასუხი და თქვენ 12 წელი რატომ გიკვირთ? 12 წლის განმავალობაში უზარმაზარი სამუშაო ჩატარდა", — განაცხადა სოზარ სუბარმა.

ცნობისთვის, "ნაციონალური მოძრაობის ხელისუფლების საქმიანობის შემსწავლელმა დროებითმა საგამოძიებო კომისიამ" დღევანდელ სხდომაზე მოუსმინა იუსტიციის მინისტრის მოადგილე ბექა ძამაშვილს, ცესკო-ს წარმომადგენელ გიორგი სანტურიანს, პროკურატურის წარმომადგენელ ირაკლი ნადარეიშვილს და შინაგან საქმეთა მინისტრის მოადგილე ალექსანდრე დარახველიძეს.

მომდევნო სხდომა 21 თებერვალს ჩატარდება და მასზე ზურაბ ჭიაბერაშვილს, ნათია მოგელაძესა და ლევან გაჩეჩილაძეს დაიბარებენ.

"წამყვანი თემა იქნება 2003-2012 წლებში გამართული სხვადასხვა დონის არჩევნები, მაგრამ მოცემულმა პირებმა უნდა იცოდნენ, რომ გასაუბრება არ იქნება მხოლოდ არჩევნებით შემოფარგლული. ყველა ის საკითხი, რომლის შესახებაც ჩვენ გვექნება ინფორმაცია, რომ მოცემული პირები ამა თუ იმ ფორმით მონაწილეობდნენ ან ჩართული იყვნენ სხვადასხვა საკითხის გადაწყვეტასა თუ მოწესრიგებაში, ჩვენ უფლება გვექნება, რომ არჩევნების მიღმაც დავუსვათ არაერთი კითხვა", — განაცხადა თეა წულუკიანმა.