"ამაზე მძიმე რეზოლუცია წარმოუდგენელია. ახლა დარჩა ორი რამ, ამ ყველაფრის აღსრულება ბრიუსელში, ასევე საქართველოში პროტესტების გაგრძელება, უფრო გაფართოება და გამძლავრება", – ამის შესახებ კოალიცია ცვლილებებისთვის ლიდერმა, ნიკა გვარამიამ განაცხადა. მისი თქმით, მნიშვნელოვანია ეკონომიკური სანქციებიც, განსაკუთრებით დიდი ბრიტანეთის მხრიდან.

გვარამია ევროპარლამენტის მიერ საქართველოსთან დაკავშირებით რეზოლუციის მიღებას გამოეხმაურა.

"ამაზე მძიმე რეზოლუცია წარმოუდგენელია. ახლა დარჩა ორი რამ, ამ ყველაფრის აღსრულება ბრიუსელში, ასევე გაგრძელება პროტესტების, უფრო გაფართოება და გამძლავრება საქართველოში. დარწმუნებული ვარ, ასეც იქნება. მნიშვნელოვანია ეკონომიკური სანქციებიც, განსაკუთრებით დიდი ბრიტანეთის მხრიდან. ცხადია, აშშ-ის მხრიდანაც, მაგრამ ევროპაში უკვე არის საუბარი იმაზე, რომ ევროკავშირის მხრიდან თუ ერთიანი ვერ იქნა, ცალკეული ქვეყნების მიერ იქნება სანქციების დადება. მოგეხსენებათ, უნგრეთის და სლოვაკეთის პრობლემაა.

შეგახსენებთ, ივანიშვილს, მაგალითად, ქონება აქვს საფრანგეთშიც, რომელი ქვეყნის მოქალაქესაც წარმოადგენს, საქართველოსთან ერთად. ასე რომ, ძალიან მნიშვნელოვანი გადაწყვეტილებაა, დიდი ერთსულოვნებაა. ვფიქრობ, ამაში ძალიან მნიშვნელოვანი წვლილი შეიტანა, პირველ რიგში, ქართველი ხალხის ნებამ, ბოლო გამოკითხვებითაც დადასტურებულმა, რუსთაველის გამზირზე დანახულმა პროტესტმაც და ბევრი ვიმუშავეთ ჩვენ, ოპოზიციონერებმაც, რომლებიც აქ ვიყავით, ასევე კოლეგებმა თბილისიდანაც. ყველა, ასე ვთქვათ, თავის ჯგუფს ეკონტაქტა, ვგულისხმობ პარტიულ ჯგუფს, და მივიღეთ ის შედეგი, რომელიც არის. ხალხის, პოლიტიკური პარტიების, თავისთავად ცხადია, მედიის როლი, მათ შორის ევროპარლამენტში აღიარებულია ეს როლი, და არასამთავრობო ორგანიზაციების ერთიანობით ჩვენ შეგვიძლია ყველაფერი. ერთად შევძელით. ერთად შევძლებთ კი არა, სამომავლო პერსპექტივაზე კი არ ვლაპარაკობთ, ერთად შევძელით. ეს არაერთხელ მოხდა, მოხდა ევროსაბჭოშიც, ევროპარლამენტშიც და მოხდება სხვაგანაც. რაც მთავარია, მოხდება საქართველოში", – განაცხადა ნიკა გვარამიამ.

13 თებერვალს ევროპარლამენტმა საქართველოს შესახებ შესახებ რეზოლუცია მიიღო, სადაც საპარლამენტთაშორისო ინსტიტუტებს და წევრ სახელმწიფოებს მოუწოდებენ, რომ პერსონალური სანქციები დაუწესონ ბიძინა ივანიშვილს, მის ოჯახს, გარემოცვას და რეჟიმის მხარდამჭერ ბიზნესმენებს და მოსამართლეებს, ასევე ტელეკომპანია იმედის და საზოგადოებრივი მაუწყებლის ხელმძღვანელებს და ეროვნული ბანკის პრეზიდენტს.