პარლამენტის ყოფილი თავმჯდომარე, ახლად დაფუძნებული შენების მოძრაობის ლიდერი დავით უსუფაშვილი მიიჩნევს, რომ კონსტიტუციის გადასინჯვის პროცესი პოლიტიკურად მძიმედ დასრულდება. ამასთან, დღეს, 6 სექტემბერს გამართულ ბრიფინგზე უსუფაშვილმა განაცხადა, რომ ქვეყნის მთავარი კანონისადმი დამოკიდებულებით საქართველოს ისედაც სუსტი სახელმწიფოებრიობა არ უნდა დაზარალდეს.

დავით უსუფაშვილის თქმით, 2004 წლის, 2010 წლის და 2017 წლის კონსტიტუციური რეფორმატორების რიტორიკა, მიდგომები, მოქმედებები და სტილი ერთმანეთს ჰგავს. მისივე განცხადებით, ქართულმა ოცნებამ ვერ გაიაზრა ფართო კონსენსუსის აუცილებლობა და ვერ მოახერხა, დაენახა განსხვავება კონსტიტუციისა და სამეცნიერო ნაშრომის შექმნას შორის:

"პირადი ამბიციების გამო მთლიანად გადაიწერა 1995 წელს მიღებული კონსტიტუცია. შეიცვალა ისიც რაც შესაცვლელი იყო და შეიცვალა ისიც, რაც მოსავლელი იყო."

უსუფაშვილის განცხადებით, ერის სახელმწიფოებრივად ორგანიზება შეუძლებელია ერის კონსტიტუციური კონსოლიდაციის გარეშე:

"იქნებ მოვახერხოთ, რომ კონსტიტუციისადმი პატივისცემის ხარისხი არ დავიდეს იმ სახიფათო ნიშნულამდე, რომელსაც იგი დღეს უახლოვდება."

შენების მოძრაობის ლიდერი მიიჩნევს, რომ საარჩევნო სისტემაზე დებატებმა მნიშვნელოვანი კონსტიტუციური თემები გადაფარა. უსუფაშვილის თქმით, მისი მოძრაობა რამდენიმე დღეში საზოგადოებას საარჩევნო სისტემის ისეთ მოდელს წარუდგენს, "რომელიც შესაძლოა გახდეს ფართო კონსენსუსის საფუძველი".

მმართველი გუნდი, ქართული ოცნება მესამე მოსმენით, სექტემბრის ბოლოს აპირებს კონსტიტუციის ახალი რედაქციის მიღებას. მესამე მოსმენით, რეგლამენტის შესაბამისად, მოწმდება რედაქციული ხასიათის საკითხები.