რესპუბლიკური პარტია თბილისში მხოლოდ საკრებულოში მოსახვედრად იბრძოლებს და მერის არჩევნებისთვის კანდიდატს არ წარადგენს. რესპუბლიკელების თავმჯდომარე და სიის პირველი ნომერი, ხათუნა სამნიძე On.ge-სთან ამბობს, რომ პარტია ამ ეტაპზე მერობის არც ერთ მსურველს არ უჭერს მხარს:

"პროდასავლური ორიენტაციის კანდიდატი, რომელიც შეძლებს და მეორე ტურში გავა იქნება ჩვენი მხარდაჭერილი."

კითხვაზე, არის, თუ არა პროდასავლური ორიენტაციის კანდიდატი, რომელსაც პრინციპულად არ დაუჭერენ მხარს, ხათუნა სამნიძე პასუხობს, რომ ამაზე საუბარი ჯერ ადრეა:

"პრინციპულად მნიშვნელოვანია, რომ შესაძლებელი იყოს ამ კონკურენტუნარიანი ოპოზიციური კანდიდატებიდან, რომლებიც არიან პროდასავლური ორიენტაციის და აქვთ უნარი, რომ დაუპირისპირდნენ ხელისუფლების კანდიდატს, ისინი მოხვდნენ მეორე ტურში."

2014 წლის თვითმმართველობის არჩევნების შედეგად, რესპულიკური პარტიის სამი წევრი თბილისის საკრებულოში კოალიცია ქართული ოცნების სიით მოხვდა. 2017 წლის 30 მაისს, რესპუბლიკურმა პარტიამ და თავისუფალმა დემოკრატებმა გაერთიანების შესახებ განაცხადეს და მოლაპარაკებები დაიწყეს ალეკო ელისაშვილთან, რომ თბილისის მერის არჩევნებში მათი სახელით მიეღო მონაწილეობა. საბოლოოდ, ელისაშვილი შემოთავაზებას არ დათანხმდა, თავისუფალმა დემოკრატებმა არჩევნებში მონაწილეობა გადაიფიქრეს, ხოლო რესპუბლიკელები მათგან დამოუკიდებლად იყრიან კენჭს.