დემოკრატიის კვლევის ცენტრი (DRC) ეხმაურება ქართული ოცნების ლიდერის, მამუკა მდინარაძის მიერ მედიისადმი ახალი რეპრესიული კანონმდებლობის დაანონსებას.

მათი შეფასებით, პარტია დაანონსებული კანონპროექტებით ცდილობს, არა მხოლოდ შეზღუდოს, არამედ სრულად გააქროს ქვეყანაში განსხვავებული და კრიტიკული აზრი. დაანონსებული საკანონმდებლო ცვლილებები, რომელიც დამოუკიდებელი მედიისა და საზოგადოებრივი ორგანიზაციების წინააღმდეგაა მიმართული, უგულებელყოფს საქართველოს კონსტიტუციას და საერთაშორისო სტანდარტებს, — წერს DRC.

"ქართული ოცნებამ ფაქტობრივად ცენზურის დაკანონება დააანონსა - კანონპროექტის მიხედვით, დგინდება "მედიის ობიექტურობის დაჟურნალისტური ეთიკის სტანდარტები". აღნიშნული ნიშნავს, რომ საინფორმაციო საშუალებებში აიკრძალება ისეთი იდეებისა და ცნობების გავრცელება, რომელიც პარტიულ ინტერესებში არ შედის, მაშინ როცა დამოუკიდებელი და თავისუფალი მედია ქვეყნის დემოკრატიული განვითარებისთვის
ამასთან, არც ერთ კანონსა და კანონქვემდებარე აქტში აღარ იარსებებს ნორმები, რომლებიც ითვალისწინებს საჯარო გადაწყვეტილებების მიღების პროცესში არასამთავრობო ორგანიზაციების ჩართულობას. მამუკა მდინარაძის განცხადებით, ასევე იგეგმება ე.წ რუსული კანონის გამკაცრება და დაუყოვნებლივ დაიწყება აღნიშნული კანონის აღსრულების პროცესი.
ქართული ოცნება ყოველდღიურად ცდილობს გამკაცრებული კანონებითა და რეპრესიული პოლიტიკით გააქროს თავისუფალი და პროევროპული ინსტიტუტები, რომელთა საქმიანობა რეალური ინფორმაციისა და კრიტიკული აზრის გავრცელებით, დემოკრატიული პროცესების განვითარებას უკავშირდება.

ადამიანის უფლებათა ევროპული სასამართლო არაერთ გადაწყვეტილებაში მსჯელობს გამოხატვის უფლების შეზღუდვის საკითხებზე და ამბობს, რომ სიტყვისა და გამოხატვის უფლება მოიცავს, მათ შორის, ისეთი მასალის გამოქვეყნებას/გავრცელებას, რომელიც არ არის მისაღები რომელიმე მხარისთვის, მითუმეტეს იმ პირობებში, როდესაც საკითხის მიმართ არსებობს მაღალი საზოგადოებრივი ინტერესი. ამ უფლების შეზღუდვა დასაშვებია მხოლოდ უკიდურეს შემთხვევაში, ლეგიტიმური მიზნის არსებობის დროს.
ქართული ოცნების დაანონსებული მძიმე კანონპროექტები ეწინააღმდეგება გაერთიანებული ერების ორგანიზაციის, ეუთოს, ევროპული საბჭოს მიერ დადგენილ სტანდარტებს, რომლის მიხედვით, დაუშვებელია სიტყვისა და გამოხატვის უფლების არაპროპორციული შეზღუდვა და ცენზურის დაწესება. დაანონსებული კანონპროექტები დიქტატურის დამყარებისკენ გადადგმული კიდევ ერთი ნაბიჯია," — განაცხადა დემოკრატიის კვლევის ცენტრმა მამუკა მდინარაძის დაანონსებულ კანონპროექტზე.

შეგახსენებთ, 5 თებერვალს, ქართულმა ოცნებამ მედიისა და სამოქალაქო ორგანიზაციების შესაზღუდად ახალი კანონების მიღება დაანონსა. მამუკა მდინარაძემ განაცხადა, რომ ოცნება მედიისთვის ახალ კანონს მიიღებს, რომლითაც დადგინდება "ობიექტურობისა და ჟურნალისტური ეთიკის სტანდარტები".

"მუშაობას დავიწყებთ ხვალიდანვე და დაინიცირდება მედიის კანონი, რომელსაც მივიღებთ ბრიტანული მოდელისა და კანონმდებლობის შესაბამისად. კანონით დადგინდება მედიის ობიექტურობის, აგრეთვე ჟურნალისტური ეთიკის სტანდარტები. განისაზღვრება აღნიშნული სტანდარტების მონიტორინგის და დაცვის ინსტიტუციური მექანიზმები. შეიზღუდება მედიასაშუალების დაფინანსება უცხოური წყაროებიდან. ბუნებრივია, ეს არ შეეხება კომერციული რეკლამებიდან მიღებულ და სხვა ამგვარ შემოსავლებს", — განაცხადა მამუკა მდინარაძემ.