"თუ უსამართლოდ სანქცირებულ ჟურნალისტს [ვასილ ივანოვ-ჩიქოვანს] დაუყოვნებლივ არ აღადგენენ სამსახურში, საზოგადოებრივი მაუწყებელი უნდა გაირიცხოს ევროპის მაუწყებელთა კავშირიდან (EBU)", — ნათქვამია "ევროპის ჟურნალისტთა ფედერაციის" (EFJ) მიერ დღეს გავრცელებულ წერილში. რომლითაც მხარდაჭერას უცხადებენ საზოგადოებრივი მაუწყებლის ჟურნალისტს, ვასილ ივანოვ ჩიქოვანს, რომელიც სამსახურიდან მზია ამაღლობელის სოლიდარობისა და არხის კრიტიკის გამო გაათავისუფლეს.

აღნიშნული წერილით "ევროპის ჟურნალისტთა ფედერაცია (EFJ) კიდევ ერთხელ ითხოვს ჟურნალისტ მზია ამაღლობელის დაუყოვნებლივ გათავისუფლებას, რომელიც ბათუმში უკანონო დაკავების შემდეგ 24 დღეა შიმშილობს. EFJ ასევე შეშფოთებულია ქვეყანაში რეპრესიების გაძლიერებით და საქართველოს საზოგადოებრივი მაუწყებლის აშკარა მიტაცებით მმართველი პარტია “ქართული ოცნების” მიერ მიმდინარე საპროტესტო აქციებსა და ადამიანის უფლებების დარღვევებზე ცენზურის დაწესების მიზნით.

მზია ამაღლობელი 12 იანვრიდან შიმშილობს დაკავებისას ყოფნისას მასზე განხორციელებული ძალადობის გამო. საქართველოს ახალგაზრდა იურისტთა ასოციაციის ინფორმაციით, მას არ მიუღია ყველა საჭირო სამედიცინო დახმარება და პატიმრობაში დამამცირებელ მოპყრობას განიცდის.

"ევროპის ჟურნალისტთა ფედერაცია" (EFJ) მხარს უჭერს საზოგადოებრივი მაუწყებლის ჟურნალისტებს, რომლებმაც დაგმეს მზია ამაღლობელის დაკავების არასათანადო გაშუქება საზოგადოებრივი მაუწყებლის საბჭოს სხდომაზე. შეხვედრა სარედაქციო დამოუკიდებლობის გამო მზარდი დაძაბულობისა და საზოგადოებრივი მაუწყებლის შენობის წინ მიმდინარე საპროტესტო აქციების ფონზე გაიმართა .

შეხვედრისას ცნობილმა ჟურნალისტმა, ვასილ ივანოვ-ჩიქოვანმა გააკრიტიკა საზოგადოებრივი მაუწყებლის საბჭოს თავმჯდომარის, ვასილ მაღლაფერიძის სარედაქციო გადაწყვეტილებებში პოლიტიკური ჩარევა, რომელიც მანამდე პარტია "ქართული ოცნების" თავმჯდომარის მოადგილე იყო და სოლიდარობა გამოუცხადა მზია ამაღლობელს. "საზოგადოებრივმა მაუწყებელმა გაკვრით ახსენა მისი დაკავების შესახებ საინფორმაციო გამოშვებაში", — თქვა მან და ხაზი გაუსვა საზოგადოებრივი მაუწყებლის ვალდებულებას ხელი შეუწყოს აღნიშნულ საქმეზე საჯარო დებატებს.

საზოგადოებრივი მაუწყებლის ტელეწამყვანმა, ნინო ზაუტაშვილმაც სოლიდარობა გამოუცხადა ამაღლობელს და ყველა "სინდისის პატიმარს" და დასძინა, რომ საზოგადოებრივმა მაუწყებელმა სრულად უნდა გააშუქოს ქვეყანაში მიმდინარე საპროტესტო აქციები.

ამის საპასუხოდ, 4 თებერვალს ვასილ ივანოვ-ჩიქოვანს საზოგადოებრივი მაუწყებლის საინფორმაციო გამოშვების წაყვანის შესაძლებლობა არ მიეცა. "EFJ ამ აკრძალვას მიუღებლად, ცენზურად და პოლიტიკურ ჩარევად მიიჩნევს. ჩვენ მოვუწოდებთ ევროპის მაუწყებელთა კავშირს ჩაერიოს", — დაჟინებით მოითხოვა EFJ-ს გენერალურმა მდივანმა, რიკარდო გუტიერესმა. "თუ უსამართლოდ სანქცირებულ ჟურნალისტს დაუყოვნებლივ არ აღადგენენ სამსახურში, საზოგადოებრივი მაუწყებელი უნდა გაირიცხოს ევროპის მაუწყებელთა კავშირიდან (EBU)", — ნათქვამია წერილში.