თეთრ სახლში გამართულ ბრიფინგზე, დონალდ ტრამპმა 30 იანვარს ვაშინგტონში მომხდარ ავიაკატასტროფაზე ილაპარაკა. როგორც ტრამპმა აღნიშნა, ხელისუფლების ხელთ არსებული ყველა რესურსი გამოყენებულია. მისი ინფორმაციით, მასშტაბური სამძებრო-სამაშველო ღონისძიებები მთელი ღამე გრძელდებოდა, მაგრამ "არავინ გადარჩენილა".

აშშ-ს პრეზიდენტმა აღნიშნა, რომ ამ დროისთვის სამაშველო სამსახურები დაღუპულთა სხეულების პოვნით არიან დაკავებულნი.

"ახლა სამუშაო გადავიდა ნეშტების მოძებნისა და ამოყვანის ფაზაში. სამწუხაროდ, არავინ გადარჩენილა. ეს იყო შავბნელი და მტანჯველი ღამე ჩვენი დედაქალაქისა და ქვეყნის ისტორიაში, შემზარავი მასშტაბების ტრაგედია". — აცხადებს ტრამპი.

წინასწარი მონაცემებით სამგზავრო თვითმფრინავში იმყოფებოდა 14 მოციგურავე რუსეთიდან. ტრამპმა სპორტსმენების ოჯახებს მიუსამძიმრა:

"როგორც ერთიანი ერი, ჩვენ დავტირით თითოეულ ძვირფას სიცოცხლეს, რომელიც უეცრად ხელიდან გამოგვეცალა. ჩვენი ქვეყანა გლოვობს.
მგზავრებს შორის იყო ნიჭიერი ადამიანების ჯგუფი რუსეთიდან. ვწუხვართ მათზე. ვხვდებით, როგორ აუტანელ ტკივილს განიცდიან მათი ახლობლები. არაფერია ამაზე საშინელი".

ტრამპმა ასევე აღნიშნა, რომ რუსეთთან დაწყებულია თანამშრომლობა დაღუპულთა ნეშტების იდენტიფიკაციისა და გადასვენების თაობაზე. ჟურნალისტის კითხვაზე, ილაპარაკა, თუ არა აშშ-ს პირველმა პირმა პუტინთან, ტრამპმა უპასუხა, რომ ამაზე არ უსაუბრია.

American Airlines-ის სამგზავრო თვითმფრინავი, რომელსაც 60 მგზავრი და ეკიპაჟის 4 წევრი გადაჰყავდა, Black Hawk-ის სამხედრო ვერტმფრენს შეეჯახა, სადაც არმიის სამი ჯარისკაცი იმყოფებოდა. თვითმფრინავი მდინარე პოტომაკში ჩავარდა