აფხაზეთიდან დევნილი კაცის ჯანმრთელობის მდგომარეობა, რომელმაც 27 იანვარს დევნილთა სააგენტოს ეზოში თავის დაწვა სცადა, ძალიან მძიმეა — ინფორმაციას ამის შესახებ, სიმონ ხეჩინაშვილის სახელობის საუნივერსიტეტო კლინიკის თერმულ დაზიანებათა და აღდგენითი პლასტიკური ქირურგიის ცენტრის ხელმძღვანელ გუგა ქაშიბაძეზ დაყრდნობით ნეტგაზეთი ავრცელებს.

ექიმის განცხადებით, პაციენტი რეანიმაციულ განყოფილებაში იმყოფება სხეულის 62%-იანი დამწვრობით, რასაც ემატება სასუნთქი გზების თერმულ ინჰალაციური დამწვრობა და გახანგრძლივებული დამწვრობითი შოკი — პაციენტი მართვით სუნთქვაზე იმყოფება.

თვითმხილველთა ინფორმაციით, შუახნის მამაკაცმა სუიციდი სახელმწიფოს მხრიდან ბინის მიღებაზე უარის გამო სცადა. ნეტგაზეთის ცნობით, ამ ფაქტის შემდეგ სახელმწიფომ უკვე შეთავაზა დაზარალებულის ოჯახს ბინა.