"სავარაუდო კიბერშეტევის გამო, საზოგადოებრივ ტრანსპორტში სამგზავრო გადახდის სისტემა დროებით გაითიშება", — ამის შესახებ განცხადებას თბილისის მერია ავრცელებს.

"სავარაუდო კიბერშეტევის გამო, საზოგადოებრივ ტრანსპორტში სამგზავრო გადახდის სისტემა დროებით გაითიშება.

საზოგადოებრივ ტრანსპორტში დამონტაჟებულ აპარატებზე, რომელთა ტექნიკურ მხარდაჭერას "საქართველოს ბანკის" კონტრაქტორი კომპანიები - შპს "მს+" და შპს "აზრი" ახორციელებენ, ხარვეზი ფიქსირდება და აუდიო ჩანაწერი ირთვება.

პრობლემის აღმოსაფხვრელად, შესაბამისი კომპანიების წარმომადგენლებმა ოპერატიულად დაიწყეს მუშაობა. აპარატები უახლოეს პერიოდში, ხარვეზის გამოსწორებისთანავე ჩაირთვება.

აღნიშნული პერიოდის განმავლობაში, ტრანსპორტი მგზავრებს გადახდის გარეშე მოემსახურება", — ნათქვამია თბილისის მერიის მიერ გავრცელებულ განცხადებაში.

შეგახსენებთ, რომ მოქალაქეები სოციალურ ქსელში ავრცელებენ საზოგადოებრივ ტრანსპორტში გადაღებულ ვიდეოებს, სადაც საქართველოს პირველი პრეზიდენტის, ზვიად გამსახურდიას და პარლამენტის თავმჯდომარე, ზურაბ ჟვანიას ცნობილი გამოსვლების პარალელურად "ოცნების" საპატიო თავმჯდომარის, ბიძინა ივანიშვილის და "ოცნების" პრეზიდენტ მიხეილ ყავლაშვილის ხმები ისმის.