"ბათუმელების" ოპერატორის, გურამ მურვანიძის განცხადებით დაპატიმრების შემდეგ პოლიციელებმა მას ტელეფონიდან ყველა ინფორმაცია წაუშალეს. მურვანიძის თქმით, მისი დაკავების ბრძანება ბათუმის პოლიციის უფროსმა, ირაკლი დგებუაძემ გასცა.

"ჩემი დაკავება ბათუმის პოლიციის უფროს ირაკლი დგებუაძის უშუალო ბრძანებით მოხდა, როცა გაიგო, რომ ბათუმელების თანამშრომელი ვიყავი. დაკავების მომენტში ორივე ხელი მაღლა მქონდა აწეული და მობილური ტელეფონით საპროტესტო აქციას ვიღებდი. ირაკლი დგებუაძემ პოლიციის თანამშრომლებს უბრძანა, წაერთმიათ ჩემთვის ტელეფონი და წაეშალათ ინფორმაცია. ამ ბრძანების მოსმენისთანავე, ჩემთან მოვიდა რამდენიმე პოლიციელი და ხელების დამტვრევის მუქარით მომთხოვეს მეჩვენებინა თუ რას ვიღებდი და წამეშალა. მოვასწარი ტელეფონის დაბლოკვა და მოგვიანებით გავთიშე ის,“ — აცხადებს მურვანიძე.

გურამ მურვანიძე პოლიციამ 12 იანვარს დააკავა. დაკავების დროს გურამ მურვანიძე საქართველოს საკონსტიტუციო სასამართლოსთან მიმდინარე საპროტესტო აქციას აშუქებდა. ბათუმის საქალაქო სასამართლომ გურამ მურვანიძეს რვადღიანი ადმინისტრაციული პატიმრობა შეუფარდა. გურამ მურვანიძემ ფოთის იზოლატორი, 20 იანვარს დატოვა.