საზოგადოებრივი მაუწყებლის შენობასთან ყოველდღიური სახალხო ეთერი დღესაც გაგრძელდა — დღევანდელი ეთერის თემა ეთნიკური უმცირესობები იყო, რომელთა წარმომადგენლებმაც თავიანთ საჭიროებებსა და არსებულ გამოწვევებზე ისაუბრეს.

"თუ შენ არ იცი შენს ქვეყანაში რა ხდება, მაშინ ვერც ამ პროცესების ნააწილი იქნები და ვერც ინფორმირებული, თუ რისი უფლება გაქვს და რისი — არა. დღეს ჩვენ სწორედ ამაზე ვისაუბრებთ", — ამბობს აქტივისტი თოზუ გულმამედლი.

აქციას ესწრებოდა ექიმი ვაჟა გაფრინდაშვილიც, რომელსაც პროტესტის ნიშნად ნიღაბი დღესაც ეკეთა.

"13 დეკემბრიდან პირბადით დავდივარ და იდენტიფიცირებისთვის ვატარებ პირად ნომერს, არანაირ დანაშაულს არ ჩავდივარ — დანაშაულს ჩადის პოლიცია, რომლის იდენტიფიცირებაც შეუძლებელია. ამით სოლიდარობას ვუცხადებ გუშინ დაკავებულებსაც — სანქცირებული მინისტრის მიერ დაკავებულ მოქალაქეებს სანქცირებული მოსამართლეები ასამართლებენ არალეგიტიმური პრეზიდენტის მიერ ხელმოწერილი უსამართლო კანონებით, რაც ადამიანის ყველა უფლების დარღვევაა", — აცხადებს ვაჟა გაფრინდაშვილი.

ფოტო: NEWS.On.ge

გარეეთერის დასრულების შემდეგ, საზოგადოებრივ მაუწყებელთან შეკრებილი მოქალაქეები მსვლელობით პარლამენტისკენ გაემართნენ და იქ მიმდინარე უწყვეტ პროევროპულ აქციას შეუერთდნენ, რომელიც 53-ე დღეა გრძელდება.