"დაუმორჩილებლობა ნიღბებით" — 18 იანვარს ფილარმონიიდან პარლამენტის შენობამდე საპროტესტო მსვლელობა გაიმართა.

მსვლელობის მონაწილეებმა, სამოქალაქო აქტივისტებმა აღნიშნული მარში მას შემდეგ დააორგანიზეს, რაც თემქაზე, პოლიციის შენობასთან გამართულ აქციაზე ნიღბით სახის დაფარვის გამო, 6 პირი დააკავეს. დაკავებულები არიან რეჟისორი გურამ მაცხონაშვილი, მარიამ პაიჭაძე, სონა კალანდაძე, თამარა ჩუმაშვილი, რომან აკოპოვი და მარიამ გილაშვილი.

აქციის მონაწილეები სოლიდარობას უცხადებენ მარიამ სიჭინავასა და სხვა ზუგდიდელ აქტივისტ ქალებს, რომელთაგან ფეიერვერკის და ნიღბის გამო ზოგი ორჯერ, ზოგი კი ერთხელ დააჯარიმეს.

ქართული ოცნების პარლამენტმა საკანონმდებლო პაკეტი, რომლითაც აქციებზე პიროტექნიკის, ლაზერების ქონა და სახის დაფარვა აიკრძალა, 13 დეკემბერს მიიღო. ოცნების მიერ მიღებული კანონის დარღვევა იწვევს სამართალდამრღვევის დაჯარიმებას 5 000 ლარის ოდენობით ან ადმინისტრაციულ პატიმრობას 15 დღემდე ვადით, ხოლო თუ სამართალდამრღვევი ორგანიზატორია – მის დაჯარიმებას 15 000 ლარის ოდენობით ან ადმინისტრაციულ პატიმრობას 15 დღემდე ვადით.

ასევე იხილეთ: საშუალოდ 1000 %-ით გაზრდილი ჯარიმები — რეპრესიები საპროტესტო აქციის მონაწილეებისთვის