ბათუმელი სამოქალაქო აქტივისტი, ციალა ქათამიძე არაძალადობრივი წინააღმდეგობის ორგანიზაციას აფუძნებს, რომლის მიზნებიც იქნება:

• ქართული ოცნებისათვის არაძალადობრივი საზოგადოებრივი წინააღმდეგობის გაწევა და სამოქალაქო დაუმორჩილებლობის გამოცხადება;
• პოლიტიკური პატიმრების საქმეების შესახებ ადგილობრივი და საერთაშორისო საზოგადოებისათვის დეტალური ინფორმაციის გაცნობა და მათი გათავისუფლებისთვის სხვადაახვა სახის აქტივობების განხორციელება;
• პოლიტიკური ნიშნით სამსახურიდან გათავისუფლებული ან სხვა სასანქციო ფორმით დასჯილი საჯარო მოხელეების და საბიუჯეტო ორგანიზაციების თანამშრომლების ინტერესების დაცვა;
• პოლიტიკური რეპრესიების შედეგად დაზარალებული პირების მხარდასაჭერად საზოგადოებრივი რესურსების მობილიზება და სამოქალაქო სოლიდარობის უზრუნველყოფა;
• 2008 წლის საერთო-სახალხო გამოკითხვის — პლებისციტის საფუძველზე დადასტურებული და საქართველოს კონსტიტუციით აღიარებული პოლიტიკური კურსის - საქართველოს ევროპულ და ევროატლანტიკურ სტრუქტურებში ინტეგრაციის პროცესის მხარდაჭერა;
• პრორუსული, დესტრუქციული პოლიტიკური ძალების და მედია საშუალებების მხრიდან ტირაჟირებული ანტიდასავლური დეზინფორმაციული გზავნილების გაქარწყლება და საქართველოს ევროპული არჩევანის მიმართ საზოგადოებრივი მხარდაჭერის გაძლიერება;

"ფალსიფიცირებული საპარლამენტო არჩევნების და არალეგიტიმური ხელისუფლების მხრიდან ღიად გაცხადებული ანტიდასავლური კურსის შემდგომ დაწყებულ საპროტესტო მოძრაობას, ქართული ოცნების რეჟიმი ძალადობრივი მეთოდებით დაუპირისპირდა, განსხვავებული აზრის მქონე ადამიანებზე ანგარიშსწორების და რეპრესიების ტალღა კიდევ უფრო მეტად იზრდება, საქართველო შორდება დემოკრატიული სამყაროს და ქვვეყნის კონსტიტუციით განსაზღვრულ ძირითად პრინციპებსა და ღირებულებებს.

მოცემულ ფონზე, არსებული გამოწვევების პირობებში, ბათუმში ვაფუძნებ სამოქალაქო წინააღმდეგობის მოძრაობას, რომლის მთავარი მიზანი იქნება ქართული ოცნების რუსული რეჟიმისთვის არაძალადობრივი საზოგადოებრივი წინააღმდეგობის გაწევა.

აღნიშნული მოძრაობა შექმნის ღია საზოგადოებრივ პლატფორმას, რომელიც შესაძლებლობას მისცემს სტუდენტებს, პედაგოგებს, სამეცნიერო წრეებს, სამოქალაქო ორგანიზაციების წევრებს და სხვადასხვა პროფესიის ადამიანებს, რომ გაერთიანებული ძალებით და რესურსების კონსოლიდირებით, წინააღმდეგობა გაუწიონ ქართული ოცნების ავტორიტარულ, საპოლიციო რეჟიმს და ერთად დაიცვან ქვეყნის დემოკრატიული, ევროპული არჩევანი.

საქართველოში გასული წლის ნოემბრიდან დაწყებული საპროტესტო აქციების, ერთ-ერთ მთავარ ეპიცენტრად, სწორედ ბათუმი იქცა, სადაც უკვე 50 დღეზე მეტია უწყვეტ რეჟიმში გრძელდება საზოგადოებრივი პროტესტი და მნიშვნელოვანი იქნება, რომ სამოქალაქო წინააღმდეგობაში ჩართულმა თანამოაზრეებმა ორგანიზებულ პლატფორმაშიც შეძლონ საერთო მიზნების გარშემო კონცენტრირება.

ბათუმი ისტორიულად ქვეყნის ევროპასთან დამაკავშირებელ საკვანძო ჰაბს წარმოდგენდა, 1921 წელს რუსული ოკუპაციის შემდგომ საქართველოს პირველი რესპუბლიკის დევნილმა მთავრობამ ბათუმიდან დატოვა ქვეყანა, დღევანდელი ურთულესი პოლიტიკური გამოწვევების ფონზე, საქართველოს პირველი რესპუბლიკის ისტორიული მემკვიდრეობის გაგრძელებისთვის, ქვეყნის ევროპული მომავლის დაცვისა და რუსულ რეჟიმთან წინააღმდეგობის გაწევის მიზნით, სიმბოლურია სამოქალაქო მოძრაობის სწორედ ბათუმში დაფუძნება.

მივმართავ ყველა იმ მოქალაქეს, ვისაც სურს საკუთარი წვლილის შეტანა საქართველოში რუსული რეჟიმის დემონტაჟის პროცესში, შემეხმიანეთ. (ტელეფონი: 595 807 843; ელექტრონული ფოსტა: [email protected])", — აცხადებს ციალა ქათამიძე