შენების მოძრაობის თბილისის მერობის კანდიდატს, თენგიზ შერგელაშვილს მიაჩნია, რომ თბილისში პარკირებიდან ამოღებულ თანხას მერია მის განვითარებაზე უნდა ხარჯავდეს. როგორც მოძრაობაში აცხადებენ, შერგელაშვილმა თბილისში პარკირების პრობლემაზე ბრიფინგი გამართა.

შერგელაშვილის ინფორმაციით, თბილისის მერიამ სითი პარკის დახმარებით, მოქალაქეებისგან, სამი წლის განმავლობაში, 21 მილიონი ამოიღო, რაც კომპანიის შემოსავლების 60 პროცენტი იყო. მისი თქმით, ქალაქში მოძრავ 10-12 მანქანაზე პარკირების ერთი ადგილი მოდის.

"ხელისუფლება ვალდებულია თბილისელებს აუხსნას რატომ არ მოხმარდა ეს თანხა სწორედ პარკირების პრობლემის მოგვარებას. მივმართავთ ქართულ ოცნებას და მის კანდიდატს, საზოგადოებას მიაწოდოს ამ საკითხთან დაკავშირებით ინფორმაცია, განმარტონ თუ რას მოხმარდა აღნიშნული თანხები და რა გაკეთდა იმისათვის, რომ პარკირების ადგილები გაზრდილიყო. ნათელია, რომ სახელისუფლებო კანდიდატი ცდილობს პრობლემა ოპერატორ კომპანიას გადააბრალოს, რათა საზოგადოებამ პასუხი მერიას არ მოსთხოვოს არც ახლა და არც მომავალში", - ამბობს თბილისის მერობის კანდიდატი.