ერთ-ერთმა დამფუძნებელმა მთავარი არხის დახურვის გადაწყვეტილება მიიღო — ინფორმაციას მთავარი არხის გენერალური დირექტორი გიორგი გაბუნია ავრცელებს.

გაბუნიას თქმით, იმ დროს, როდესაც ქართველი ხალხი ქუჩაში იბრძვის თავის უფლებების დასაცავად, არალეგიტიმური ხელისუფლების მოსაცილებლად და მოვლენების წინა ხაზზე მდგომი ჟურნალისტები სამიზნეები არიან, მთავარი არხის ერთ-ერთმა დამფუძნებელმა ზაზა ოქუაშვილმა არხის დახურვის გადაწყვეტილება მიიღო.

"მთავარი არხის" ერთ-ერთმა დამფუძნებელმა გადაწყვიტა ფაქტობრივად თვითონაც ჩაერთოს ქართული ოცნების წამოწყებულ მასობრივ ძალადობაში და მის ხელთ არსებული საშუალებებით თავადაც იძალადოს ჟურნალისტებზე რათა მათი მუშაობა შეუძლებელი გახადოს. ზაზა ოქუაშვილმა გადაწყვიტა დახუროს „მთავარი არხი“, — განაცხადა გიორგი გაბუნიამ მთავარი არხის ჟურნალისტებთან ერთად გამართულ ბრიფინგზე.

მისი თქმით, მთავარი არხი უკვე დარჩა ფინანსური წყაროების გარეშე, რაც, საბოლოოდ, არხის მუშაობას შეუძლებელს გახდის, თუმცა გაბუნიას თქმით, იბრძოლებენ და სადამდეც შეეძლებათ, იქნებიან ეთერში.

"ზაზა ოქუაშვილმა გადაწყვიტა გააკეთოს ის, რაც დღეს ბიძინა ივანიშვილს ძალიან სჭირდება - ზაზა ოქუაშვილმა გადაწყვიტა, დახუროს "მთავარი არხი".
ამას ოქუაშვილი აკეთებს რამდენიმე თვის წინ მის მიერ დანიშნული დირექტორის და მისი დავალებების მორჩილი შემსრულებლის, გოგი ქურდაძის ხელით. ქურდაძე სპეციალურად დაინიშნა კომპანიაში ოქუაშვილის წარდგინებით ერთადერთი ამოცანით - რომ ხსენებულ დამფუძნებელს ჰქონოდა არხზე ქმედითი ბერკეტი პირადი მიზნების მისაღწევად, თორემ სხვა მხრივ გოგი ქურდაძეს არ გააჩნია ტელევიზიის სპეციფიკასთან დაკავშირებული არანაირი კომპეტენცია, არც კი იცნობს არხის თანამშრომლებს, აიგნორებს მათ თხოვნას, რომ, უბრალოდ, შეხვდეს მაინც მათ! და საერთოდ არც კი დადის სამსახურში.
ერთადერთი, რასაც გოგი ქურდაძე ოქუაშვილის დავალებით აკეთებს, არის ის, რომ ბლოკავს ყველა ფინანსურ ოპერაციას კომპანიაში და უარს ამბობს კომპანიისთვის სასიცოცხლოდ მნიშვნელოვანი კონტრაქტების გაფორმებაზე." — ამბობს გიორგი გაბუნია.

არხის გენერალური დირექტორი არ გამორიცხავს ზაზა ოქუაშვილის ბიძინა ივანიშვილთან გარიგებას და ამბობს, რომ ოქუაშვილისთვის არხი მანიპულაციის საგანია.

"ალბათ, იცით, ოქუაშვილს აქვს მძიმე სასამართლო დავა ბიძინა ივანიშვილთან, რაც კი არ გამორიცხავს მათ შორის თანამშრომლობას, არამედ პირიქით - სწორედ ამ დავაში შეთანხმების მისაღწევად ოქუაშვილს ძალიან სჭირდება "მთავარი არხით" მანიპულირება.
ქართულ ოცნებასთან გარიგება ოქუაშვილის მხრიდან სიახლე არ არის - შეგახსენებთ, რომ სწორედ მისი ოჯახის წევრებმა, ნატო და როსტომ ჩხეიძეებმა მისცეს ხმა ოცნებისთვის სასურველ იუსტიციის საბჭოს წევრებს მაშინ, როდესაც ხელისუფლებას აკლდებოდა საკუთარი ხმები ამ კანდიდატების გასაყვანად და აუცილებლად სჭირდებოდა რამდენიმე ოპოზიციური ხმაც. მაშინ მაშველ რგოლად სწორედ ოქუაშვილის ოჯახის წევრები გამოჩნდნენ.
ჩვენ არ გვიბრძოლია ამდენი იმისთვის, რომ, საბოლოოდ, არხი - ზაზა ოქუაშვილის სახით - ბიძინა ივანიშვილს ჩავუგდოთ ხელში. ამიტომ სადამდეც შევძლებთ, ისევ ვიბრძოლებთ და ვიქნებით ეთერში ჩვენი მაყურებლისთვის და ქართველი ხალხისთვის.
მთავარი ხართ თქვენ და ჩვენთვის მთავარია, ბოლო წუთამდე ვიდგეთ ჩვენს კოლეგებთან ერთად ყველაზე ცხელ წერტილებში და მოგიყვეთ, რა ხდება იქ, სადაც წყდება საქართველოს ბედი და ვერანაირი გოგი, ვერანაირი ზაზა და ვერც პუტინის მეგობარი ბიძინა ვერ შეგვაჩერებს!" — აცხადებს გიორგი გაბუნია.