ქართული ოცნება საკრებულოებში პროპორციული წესით არჩეული დეპუტატების რაოდენობას ამცირებს, მაჟორიტარებისას კი ზრდის. კანონპროექტს პარლამენტი, რომელშიც მხოლოდ სახელისუფლებო პარტია შევიდა, დაჩქარებული წესით განიხილავს.

2021 წლის თვითმმართველობის არჩევნებზე საქართველოს მასშტაბით გადასანაწილებელი მაჟორიტარული მანდატების 89,5% ქართულმა ოცნებამ აიღო, როცა პროპორციული წესით მანდატების მხოლოდ 55,6% მიღება შეძლო.

ამ საკანონმდებლო ცვლილებებით პარლამენტი უბრუნდება 2017 წლის მდგომარეობას, რომელიც შარლ მიშელის შეთანხმებამ შეიცვალა. იურიდიულ საკითხთა კომიტეტის სხდომაზე კანონპროექტის ერთ-ერთმა ავტორმა გივი მიქანაძემ წლების წინ არსებულ მოდელთან დაბრუნება "ამომრჩეველთა ინტერესებით" ახსნა.

თუ ოცნება კანონპროექტს მიიღებს, თბილისის საკრებულოში 50 დეპუტატიდან 25 მაჟორიტარი იქნება, რაც ახლანდელ რაოდენობაზე (10-ზე) 15-ით მეტია; რაც შეეხება თვითმმართველ ქალაქებს, აქ 35 დეპუტატიდან 15 მაჟორიტარი იქნება, როცა ამჟამინდელი მდგომარეობით მათი რაოდენობა 7-ია.