უკრაინაში მებრძოლი ქართული ლეგიონი განცხადებას ავრცელებს, რომელშიც უარყოფს, რომ საქართველოში დაბრუნებასა და პროტესტში მონაწილეობას აპირებს და ამ ცნობებს რუსულ დეზინფორმაციად აფასებს.

"რუსულმა პროპაგანდამ ბოლო დროს მცდარი ინფორმაციის გავრცელება დაიწყო, რომ ქართული ლეგიონი საქართველოში დაბრუნებასა და პროტესტებში მონაწილეობის მიღებას გეგმავს.
ჩვენ კატეგორიულად უარვყოფთ ამ უსაფუძვლო ბრალდებებს. მიუხედავად იმისა, რომ ჩვენ სრულად ვუჭერთ მხარს ქართველი ხალხის სამართლიან აღშფოთებას საქართველოს მთავრობის მხრიდან ევროკავშირში გაწევრიანების პროგრესის შეჩერების გადაწყვეტილების თაობაზე, ჩვენი ბრძოლა რჩება აქ, უკრაინაში, სადაც ჩვენი საერთო მტერია.
ქართული ლეგიონი 2014 წლიდან მოყოლებული მტკიცედ ერთგულია უკრაინისადმი და რუსული აგრესიის წინააღმდეგ დგომას გააგრძელებს. ჩვენი ერთგულება უკრაინის გამარჯვებისადმი ურყევია და ფრონტის ხაზზე დავრჩებით, სანამ ეს მიზანი მიღწეული არ იქნება"— წერია განცხადებაში.