ძლიერი ქარის გამო ბორჯომის ტყეში ცეცხლის ლოკალიზება ისევ ვერ ხერხდება. როგორც საგანგებო სიტუაციების მართვის სამსახურმა On.ge-ს უთხრა, ამ დროისთვის ადგილზე მუშაობს ქართული ვერტმფრენი და სამაშველო ჯგუფები, ასევე, დილიდან ჩართულნი არიან სამხედროები.

ინსფრასტრუქტურისა და რეგიონული განვითარების მინისტრმა, ზურაბ ალავიძემ იმედის ეთერით განაცხადა, რომ წინა დღეებთან შედარებით მდგომარეობა უკეთესია:

"დღითიდღე უმჯობესდება მდგომარეობა, მაგრამ ხანძარი ისევ გვაქვს. არის რამდენიმე საშიში კერა, რომელსაც ვამუშავებთ და სადაც დიდი რაოდენობის მძიმე ტექნიკა მუშაობს".

ბორჯომის ტყეში ხანძარი 20 აგვისტოს გაჩნდა. როგორც საგანგებო სიტუაციების მართვის სამსახურში ამბობენ, ლოკალიზებული კერები ქარის გამო კვლავ ღვივდება. დღის განმავლობაში ადგილზე აზერბაიჯანული და თურქული სამაშველო ჯგუფები და ტექნიკა მუშაობდა.