კონსტიტუციური უმრავლესობა ვერ მივიღეთ, მაგრამ არ გამოვრიცხავთ დავიწყოთ მუშაობა და ნაციონალურ მოძრაობასთან კავშირში მყოფმა პირებმა პასუხი აგონ, — ამის შესახებ ქართული ოცნების გენერალურმა მდივანმა, კახა კალაძემ ჟურნალისტებს განუცხადა.

მისი თქმით, საბოლოო გადაწყვეტილებას სასამართლო მიიღებს.

"ნაციონალური მოძრაობის და ოპოზიციის აკრძალვაზე ჩვენ კამპანიის დროს გავაკეთეთ განცხადება. მნიშვნელოვანი იყო კონსტიტუციური უმრავლესობის მიღება. იყო მთელი რიგი გეგმები და გადასადგმელი ნაბიჯები. თუმცა მიუხედავად იმისა, რომ ჩვენ კონსტიტუციური უმრავლესობა ვერ მივიღეთ, არ გამოვრიცხავთ დავიწყოთ მუშაობა იმისთვის, რომ ყველა იმ ადამიანმა აგოს პასუხი, რომელსაც ქვეყნის წინაშე მოღალატეობრივი ქმედებები აქვს ჩადენილი, ვინც წარმოადგენდა ნაციონალურ მოძრაობას. ძალიან მძიმედ დაამახსოვრდა ჩვენი ქვეყნის მოსახლეობას მათი ხელისუფლებაში ყოფნა. როგორ შეიძლება იყო ხელისუფალი და ექცეოდე შენი ქვეყნის მოსახლეობას ისე, როგორც ეს ადამიანები ხელისუფლებაში ყოფნის პირობებში ექცეოდნენ. შესაბამისად, ყველას და ყველაფერს უნდა გაეცეს შესაბამისი პასუხი. ცხადია, ამას სჭირდება მტკიცებულებები, რომელიც უამრავი არსებობს. შესაბამისად, საბოლოო ჯამში, სასამართლოს მისაღები იქნება გადაწყვეტილება, იმ მტკიცებულებებსა და ფაქტებზე დაყრდნობით, თუმცა ჯერ დაველოდოთ ჩვენი მხრიდან მიღებულ გადაწყვეტილებას", — განაცხადა კახა კალაძემ.

ოპოზიციური პარტიების არაკონსტიტუციურად გამოცხადებასთან დაკავშირებით განცხადება გუშინ პრემიერმინისტრმა, ირაკლი კობახიძემაც გააკეთა. მისი თქმით, თუ ოპოზიციური პარტიები კონსტიტუციური წყობილების წინააღმდეგ სიარულს გააგრძელებენ, შეიძლება მათი არაკონსტიტუციურად გამოცხადების საკითხი განიხილონ.